OĞUZUN TİBB İŞÇİLƏRİ PEŞƏ BAYRAMLARINI QEYD ETMİŞLƏR
Oğuz rayon mərkəzi xəstəxanasında Tibb İşçiləri gününə həsr olunmuş bayram tədbiri keçirilmişdir.
AZƏRTAC xəbər verir ki, səhiyyə işçiləri və ictimaiyyətin nümayəndələri əvvəlcə ümummilli liderimiz Heydər Əliyevin adını daşıyan parka gəlmiş, ulu öndərin abidəsini ziyarət etmiş, önünə gül-çiçək düzmüşlər.
Tədbiri giriş sözü ilə xəstəxananın baş həkiminin müavini Anar Əzizov açaraq, əhalinin sağlamlığının qorunması sahəsində görülən işlər, rayonun tibb işçilərinin qazandığı uğurlar barədə danışmış, ölkə rəhbərliyi tərəfindən səhiyyənin inkişafına göstərilən yüksək dövlət qayğısından söz açmışdır.
Rayon icra hakimiyyətinin başçısı Aydın Əlihüseynov çıxış edərək rayonun tibb işçilərini peşə bayramları münasibətilə təbrik etmiş, onlara uğurlar arzulamışdır. Təməli ümummilli liderimiz Heydər Əliyev tərəfindən qoyulmuş sosial-iqtisadi siyasətin hazırda Prezident İlham Əliyev tərəfindən uğurla davam etdirildiyini xüsusi vurğulayan icra başçısı, son illər bütün sahələrdə olduğu kimi, səhiyyə sahəsində də geniş islahatların aparıldığını, tibbi xidmətin keyfiyyətinin yaxşılaşdırılması üçün zəruri tədbirlərin həyata keçirildiyini, tibb müəssisələrində pullu xidmətin ləğv olunduğunu, kadr hazırlığına xüsusi diqqət yetirildiyini bildirmişdir. Səhiyyənin maddi-texniki bazasının möhkəmləndirilməsi istiqamətində həyata keçirilən tədbirlərə toxunan A.Əlihüseynov hazırda respublikanın şəhər və rayonlarında müalicə-diaqnostika mərkəzlərinin, yeni xəstəxanaların inşa edildiyini bildirmiş, o cümlədən Oğuz şəhərində tikilən yeni mərkəzi xəstəxana binasının cari ilin payızında əhalinin istifadəsinə veriləcəyini, burada yüksək standartlara uyğun avadanlığın, aparatların quraşdırılacağını nəzərə çatdırmışdır.
Tədbirdə çıxış edən tibb işçiləri səhiyyənin inkişafına yönələn tədbirlərdən razı qaldıqlarını bildirmiş, cari ilin payızında keçiriləcək növbəti prezident seçkilərində hamılıqla Azərbaycanın işıqlı gələcəyinin təminatçısı olan Prezident İlham Əliyevə səs verəcəklərini xüsusi vurğulamışlar.
Bölmənin digər xəbərləri
