REGİONLAR
Olimpiada mükəmməl təşkilatçılığı, gərgin mübarizələr, maraqlı oyunlarla yaddaşlarda qalacaq
Naxçıvan, 8 oktyabr, AZƏRTAC
Naxçıvanda keçirilən on altı yaşadək yeniyetmələr arasında Ümumdünya Şahmat Olimpiadası iştirakçılarının muxtar respublikanın mədəniyyət müəssisələri, tarixi abidələri ilə tanışlığı davam edir.
AZƏRTAC-ın Naxçıvan bürosu xəbər verir ki, iştirakçılar Naxçıvan Dövlət Tarix, Bəhruz Kəngərli muzeylərini və Hüseyn Cavidin ev-muzeyi və xatirə kompleksini ziyarət ediblər. Naxçıvan Dövlət Tarix Muzeyində iştirakçılara məlumat verilib ki, Naxçıvan Muxtar Respublikasının həm yaşıdı olan muzey 1924-cü ildə yaradılıb. Muzeyin ekspozisiyası qədim dövrdən başlayaraq müasir dövrün tarixini özündə ehtiva edən eksponatlarla zəngindir. İlk dövrlərdə cəmi bir neçə yüz eksponatla fəaliyyətə başlayan muzeydə qədim diyarın tarixi, arxeologiyası və etnoqrafiyasını əks etdirən 35 mindən çox eksponat mühafizə olunmaqla yanaşı, həm də geniş şəkildə təbliğ edilir.
Bəhruz Kəngərli Muzeyində olan qonaqlara bildirilib ki, ümummilli lider Heydər Əliyevin şəxsi təşəbbüsü ilə Naxçıvan şəhərində Bəhruz Kəngərlinin xatirəsinə muzey yaradılıb, 2002-ci il 18 iyun tarixində bu muzeyin açılış mərasimi olub. Naxçıvan Muxtar Respublikası Ali Məclisi Sədrinin “Görkəmli rəssam Bəhruz Kəngərlinin 120 illik yubileyinin keçirilməsi haqqında” 2012-ci il 12 yanvar tarixli Sərəncamı ilə təsdiq olunmuş Tədbirlər Planına əsasən bir sıra tədbirlər həyata keçirilib. Bəhruz Kəngərli Muzeyi müasir tələblər səviyyəsində yenidən qurulub, 2013-cü ildə yenidənqurmadan sonra açılışı olan muzey yeni eksponatlarla daha da zənginləşdirilib. Rəssamın Azərbaycan Dövlət İncəsənət Muzeyində saxlanılan 200-ə yaxın əsərinin yüksəkkeyfiyyətli surəti çıxarılaraq Bəhruz Kəngərli Muzeyinə gətirilib. Hazırda muzeydə Bəhruz Kəngərli irsinə aid 1300-dən çox eksponat nümayiş olunur. Bunlardan da 61-i orijinal rəsm əsəridir. Muzeyi gəzən qonaqların diqqətini realist rəssamın “Qaçqınlar” silsiləsindən olan əsərləri çəkib.
Hüseyn Cavidin ev-muzeyində isə məlumat verilib ki, bu il Azərbaycan ədəbiyyatının görkəmli nümayəndəsi, mütəfəkkir şair və dramaturq Hüseyn Cavidin anadan olmasının 140 ili tamam olur. Prezident İlham Əliyev dramaturqun 140 illiyinin qeyd edilməsi haqqında müvafiq Sərəncam imzalayıb. Bu, Azərbaycan ədəbiyyatında romantizm ədəbi cərəyanının əsas nümayəndəsi olan Hüseyn Cavidin çoxşaxəli və zəngin yaradıcılıq fəaliyyətini yenidən öyrənmək, tədqiq etmək işində mühüm rol oynayacaq.
Beynəlxalq hakim, yarışın antiçitinq rəhbəri, özbəkistanlı Xusan Turdaliyev Ümumdünya Şahmat Olimpiadasının gedişi ilə bağlı AZƏRTAC-ın Naxçıvan bürosuna müsahibəsində bildirib ki, olimpiada yüksək səviyyədə təşkil olunub, hər şey qaydasındadır. İstər hotellər, istər yarışın keçirildiyi məkan əla düzəldilib və iştirakçıların rahatlığı təmin edilib.
“İlk dəfədir, Naxçıvana gəlirəm və çox şadam. Şəhəriniz çox sakit və təmizdir, insanlar gülərüz, dostcanlıdırlar. Yaxınlaşıb, bizə köməklik etmək istədiklərini deyirlər. Bu, bizi çox sevindirir”, - deyən Xusan Turdaliyev qeyd edib ki, yarışda artıq 6 tur geridə qalıb, gərgin qarşılaşmaların şahidi oluruq. Sevindirici haldır ki, rəqiblər oyun zamanı bir-birlərinə yaxşı mənada müqavimət göstərə bilirlər, sonda kimin qalib gələcəyini demək isə çətindir. Hazırda turnir cədvəlinə baxaraq demək olar ki, Türkiyə, Azərbaycan, Qazaxıstan və Özbəkistan yarışın əsas favoritləridir. Lakin sona qədər səbir etmək lazımdır.
Misir komandasının kapitanı Mustafa Hamidi İbrahim deyib ki, yarışa elə də yaxşı başlamamışıq. Rəqiblərimiz çox güclüdürlər və onlarla mübarizə aparmaq bizi sevindirir. Bu yarış həm də yeniyetmə şahmatçılarımızın oyun təcrübəsini artırır. Qarşıda hələ növbəti oyunlarımız var, çalışıb bu qarşılaşmalarda qələbə qazanıb turnir cədvəlində üst pillələrə irəliləmək istəyirik. Amma oyunlardan nə gözləniləcəyi bilinmir.
Mustafa Hamidi İbrahim deyib: “Təşkilatçılıq son dərəcə əla və yüksək səviyyədədir. Onu da deyim ki, vaxt olduqca, şəhəri gəzirəm. Buranın sakitliyi, insanlarının gülərüz olması xoşuma gəlir. Həmçinin çalışdığım qədər yeni dostlarla tanış oluram. Hətta burada tanış olduğum dostlarla boş vaxtlarımızda şahmat oynayırıq. Bir daha yüksək qonaqvərpərliyə görə minnətdarıq”.
Hindistan komandasının kapitanı Tejas Bakre isə bildirib ki, Naxçıvanın insanları gözəl, mehriban və qonaqpərvərdirlər. “Biz burada müxtəlif tarixi yerləri gəzdik, Naxçıvan haqqında kifayət qədər məlumatımız oldu. Ölkəmə qayıdandan sonra dost-tanışlarıma buraya mütləq gəlmələrini söyləyəcəyəm. Bizim üçün burada hər cür şərait yaradılıb. Olimpiada barədə onu deyim ki, 20-dən artıq ölkədən güclü oyunçular var. Hazırda rəqabətli oyunlar gedir, Türkiyə, Hindistan, Qazaxıstan, İran komandaları reytinqdə yüksək yerdədirlər. Onlardan biri sonda yarışı qazanacaq”, - deyə Tejas Bakre vurğulayıb.