Ölkəmizdə qazanılan nailiyyətlər ulu öndər Heydər Əliyevin xidmətlərinin bəhrəsidir
Bakı, 10 may, AZƏRTAC
Mayın 10-da Dövlət İmtahan Mərkəzində (DİM) ümummilli lider Heydər Əliyevin anadan olmasının 95 illiyinə həsr edilən tədbir keçirilib.
Əvvəlcə tədbir iştirakçıları DİM-in binasındakı ulu öndər Heydər Əliyevin büstü önünə gül dəstələri düzüb, dahi rəhbərin xatirəsi anılıb.
DİM-dən AZƏRTAC-a bildiriblər ki, tədbirdə bu qurumun Direktorlar Şurası sədrinin müavini Namiq Babayev müasir Azərbaycan dövlətinin qurucusu Heydər Əliyevin zəngin həyat və fəaliyyətindən, onun elmimizə, təhsilimizə xüsusi diqqət və qayğısından danışıb.
Qeyd edilib ki, ölkəmizdə qazanılan bütün nailiyyətlər Heydər Əliyev siyasətinin bəhrəsidir. Ulu Öndərin Azərbaycana rəhbərlik etdiyi bütün dövrlərdə iqtisadiyyat, elm, təhsil və digər sahələrdə böyük uğurlar qazanılıb.
Sonra Ulu Öndərin Tələbə Qəbulu üzrə Dövlət Komissiyasının (indiki Dövlət İmtahan Mərkəzinin) fəaliyyəti ilə əlaqədar fikir və tövsiyələrini əks etdirən film nümayiş olunub.
Digər çıxış edənlər də ümummilli lider Heydər Əliyevin şəxsiyyətinin böyüklüyündən, ideyalarının əhəmiyyətindən bəhs ediblər.
Bölmənin digər xəbərləri
