OMBUDSMAN AVROPA ŞURASININ AZƏRBAYCANDAKI NÜMAYƏNDƏLİYİNİN RƏHBƏRİ İLƏ GÖRÜŞMÜŞDÜR
Ombudsman Aparatından AZƏRTAC-a bildirmişlər ki, Azərbaycan Respublikasının insan hüquqları üzrə müvəkkili Elmira Süleymanova Avropa Şurasının (AŞ) Azərbaycandakı nümayəndəliyinin rəhbəri xanım Veronika Kotek ilə görüşmüşdür.
Müvəkkil qonağı yeni təyinatı münasibətilə təbrik etmiş, diplomatik fəaliyyətində uğurlar arzulamış, təmsil etdiyi təşkilatın Avropa məkanında nüfuzlu qurum kimi tanındığını, demokratik prinsiplərə əsaslandığını, insan hüquqlarının müdafiəsi, habelə vətəndaş cəmiyyətinin inkişafı üzrə səmərəli fəaliyyət göstərdiyini bildirmişdir. Azərbaycanın Avropaya inteqrasiya yolunu seçdiyi və çoxsaylı beynəlxalq konvensiyaya qoşulduğu, ölkəmizin beynəlxalq təşkilatlarla, o cümlədən Avropa Şurası ilə münasibətlərin genişləndirilməsində maraqlı olduğu nəzərə çarpdırılmışdır.
V.Kotek ölkəmizdə insan hüquqlarının təmin olunması və müdafiəsi vəziyyəti ilə maraqlanmışdır.
Müvəkkil insan hüquqlarının dəstəklənməsinin Azərbaycanın demokratik inkişafının mühüm istiqamətlərindən olduğunu qeyd etmişdir.
Görüşdə əməkdaşlığın perspektivləri müzakirə olunmuşdur. Müvəkkil qonağın əhalinin müxtəlif təbəqələrinin hüquqi maarifləndirilməsi, regional ofislərin işi və digər məsələlər barədə suallarını ətraflı cavablandırmışdır.
Bölmənin digər xəbərləri
