Ötən il gömrükçülər tərəfindən 1 tondan çox narkotik vasitə dövriyyədən çıxarılıb
Bakı, 31 yanvar, Elvin Camalov, AZƏRTAC
2018-ci ildə gömrükçülər tərəfindən 1 tondan çox narkotik vasitə dövriyyədən çıxarılıb.
AZƏRTAC xəbər verir ki, bu barədə Dövlət Gömrük Komitəsi sədrinin birinci müavini İsmayıl Hüseynov deyib.
“Gömrük sərhədindən narkotiklərin qanunsuz keçirilməsinin qarşısını almaq məqsədilə gömrük orqanları tərəfindən, o cümlədən digər hüquq-mühafizə orqanları ilə birlikdə görülmüş qətiyyətli tədbirlər nəticəsində narkotik vasitələrin, psixotrop maddələrin və onların prekursorlarının qanunsuz dövriyyəsi ilə əlaqədar ötən il 264 fakt aşkarlanıb. Bu faktlar üzrə ümumilikdə 1 ton 193 kiloqram narkotik qanunsuz dövriyyədən çıxarılıb. İl ərzində narkotiklərin qanunsuz dövriyyəsində şübhəli bilinən 291 nəfər barəsində müvafiq tədbirlər görülüb, 24 halda bu əməlləri törədən cinayətkar dəstə ifşa edilib”, - deyə o əlavə edib.
Bölmənin digər xəbərləri
