Naxçıvan, 28 yanvar (AZƏRTAC). Azərbaycan Respublikası Prezidentinin “Sahibkarlıq fəaliyyəti subyektlərinin fəaliyyətinin “bir pəncərə” prinsipi üzrə təşkilinin təmin edilməsi tədbirləri haqqında” 2007-ci il 25 oktyabr tarixli Sərəncamına müvafiq olaraq, son 3 ildə muxtar respublikada sahibkarlıq fəaliyyətinə başlamaq qaydalarını sadələşdirmək məqsədi ilə “bir pəncərə” prinsipi tətbiq olunur.

Sərəncamın icrası nəticəsində təkcə 2010-cu ildə sahibkarlıq fəaliyyəti ilə məşğul olmaq istəyən 24 hüquqi və 1185 fiziki şəxs qeydiyyata alınmışdır. Sahibkarlığın inkişafı üçün yaradılmış münbit şəraitin nəticəsidir ki, ümumi daxili məhsul istehsalında özəl bölmənin payı 86 faizi ötmüşdür. Hazırda aqrar sektor, sənaye, ticarət, nəqliyyat, rabitə sahələrində qeyri-dövlət bölməsinin payı 83-99 faiz arasında dəyişir ki, bu da çox yüksək göstəricidir.

Muxtar respublikada sahibkarlıq subyektlərinə səmərəli maliyyə dəstəyinin göstərilməsi üçün əlverişli şərait yaradılmışdır. 2010-cu ildə bank və kredit təşkilatları tərəfindən sahibkarlara 35 milyon 909 min manatdan çox güzəştli kreditlərin verilməsi təmin olunmuşdur. İqtisadi fəaliyyətin bütün sahələrinin tarazlı inkişafını təmin etmək məqsədi ilə kreditlər verilərkən onların çoxsahəli olması diqqət mərkəzində saxlanmışdır. Ötən il verilən kreditlərin 7 milyon 143 min manatı sənayenin, 5 milyon 746 min manatı tikinti sektorunun, 11 milyon 61 min manatı kənd təsərrüfatı və balıqçılığın, 11 milyon 959 min manatı isə ticarət, nəqliyyat, kommunal və digər xidmət sahələrinin inkişafına yönəldilmişdir.

Daxili bazarın qorunması, idxaldan asılılığın aradan qaldırılması, əhalinin tələbatının daha dolğun ödənilməsində yerli istehsalın həcminin artırılması mühüm əhəmiyyət daşıyır. Bu istiqamətdə həyata keçirilən tədbirlərin nəticəsidir ki, bu gün muxtar respublikada 108-i ərzaq və 184-ü qeyri-ərzaq olmaqla 292 növdə məhsul istehsal olunur. Yeni istehsal müəssisələrinin fəaliyyətə başlaması nəticəsində istehsal olunan 247 növ məhsula olan tələbat tamamilə yerli istehsal hesabına ödənilir. Bu məhsullardan 89-u ərzaq, 158-i isə qeyri-ərzaq məhsullarıdır.

Muxtar respublikada fəaliyyət göstərən sahibkarlıq subyektlərinin əlaqələrinin inkişaf etdirilməsi, istehsal olunan məhsulların ixrac imkanlarının artırılması, onların xarici ölkələrdə tanıdılması məqsədi ilə Azərbaycanda və xarici ölkələrdə keçirilmiş 19 biznes forum və beynəlxalq sərgilərdə yerli sahibkarların iştirakı təmin edilmişdir. Ötən ilin oktyabr ayında Azərbaycan-Türkiyə biznes forumunun Naxçıvanda təşkili xarici əməkdaşlığın inkişafı, yerli məhsulların xarici bazarlara çıxarılması baxımından mühüm əhəmiyyət daşıyır.

Azad sahibkarlığın inkişafı üçün yaradılan münbit şərait yeni istehsal müəssisələrinin işə salınması, mövcud müəssisələrin fəaliyyət dairəsini genişləndirməsinə imkanlar açmaqla, eyni zamanda, məşğulluq səviyyəsinin yüksəlməsinə və əhali gəlirlərinin həcminin artmasına da səbəb olmuşdur. Ötən il muxtar respublikada əhalinin gəlirləri 2009-cu illə müqayisədə 10 faiz artaraq 1 milyard 7 milyon 484 min manata, onun hər nəfərə düşən həcmi isə 9 faiz artaraq 2 min 480 manata çatmışdır. Sosial-iqtisadi sahədə əldə olunan nailiyyətlər əhali rifahının davamlı yüksəlişinə zəmin yaratmış, 2010-cu ildə bir işçiyə hesablanmış orta aylıq əmək haqqının məbləği əvvəlki illə müqayisədə 11 faiz artaraq 303 manata çatmışdır. Əldə olunmuş sabit artım sürəti yeni iş yerlərinin yaradılmasına və səmərəli məşğulluğun təşkilinə də səbəb olmuşdur. 2010-cu ildə yaradılan 3 min 556 iş yerindən 2 min 837-si və ya 80 faizə qədəri daimidir.