Praqanı qızılca epidemiyası cənginə alıb
Praqa, 5 fevral, AZƏRTAC
Bu ilin yanvar ayında Praqada 35 qızılcaya yoluxma halı qeydə alınıb.
AZƏRTAC xəbər verir ki, paytaxtda ötən ildən elan olunan epidemiya hələ də davam edir. O vaxt bu xəstəliyə tutulanların sayı 103 nəfər idi. Bu, Praqa Gigiyena Stansiyasının məlumatında göstərilir. 2018-ci il ərzində Çexiyada cəmi 207 yoluxma halı qeydə alınıb.
Həkimlər qızılcanın hava ilə ötürülən yoluxucu xəstəlik olduğunu və bu xəstəlik üçün ikihəftəlik karantinin tələb edildiyini xatırladırlar. Ötən həftə personalın bu xəstəliyə yoluxması nəticəsində ölkə parlamentinin aşağı palatasında restoran bağlanılıb.
Moraviya-Sileziya diyarında cari ilin yanvar ayında 10 yoluxma halı qeydə alınıb ki, bu da ötən il ərzindəkindən daha çoxdur. Çexiya ərazisində 1969-cu ildən başlayaraq uşaqlara qızılca əleyhinə məcburi peyvəndlər edilir. Bununla belə, xəstəliyə qarşı immunitet vaxt ötdükcə zəifləyir.
Pərvanə Qarayeva
AZƏRTAC-ın xüsusi müxbiri
Praqa
Bölmənin digər xəbərləri
