CƏMİYYƏT
“Qardaşlaşmış Qarabağ Məktəbləri” adlı yeni layihəyə start verilib
Bakı, 19 iyul, AZƏRTAC
Azərbaycan Diasporuna Dəstək Fondu “Qardaşlaşmış Qarabağ Məktəbləri” adlı yeni layihəyə start verib.
Diasporla İş üzrə Dövlət Komitəsindən AZƏRTAC-a bildirilib ki, davamlılığının təmin olunması nəzərdə tutulan ilk layihə iyulun 18-24-də gerçəkləşdiriləcək.
“Qardaşlaşmış Qarabağ Məktəbləri” layihəsi çərçivəsində İsveçrədə fəaliyyət göstərən həftəsonu məktəbinin şagirdləri, keçmiş məcburi köçkün və şəhid ailələrinin övladları Bakının Xəzər rayonunun Şüvəlan qəsəbəsində yerləşən “Cırtdan” Respublika Uşaq İstirahət və Sağlamlıq mərkəzində bir həftə ərzində səmərəli vaxt keçirəcəklər. Şagirdlərin mədəni-maarifləndirici panellərdə iştirakı, ölkəmizin dilbər guşələrinə səyahəti, muzeylərə səfəri nəzərdə tutulur.
Layihədə İsveçrədən 10 şagird və 2 təlimçi, yerli məktəblərdən 14 şagird və 2 təlimçi iştirak edir. Burada onlara daimi kommunikasiya və şəbəkələşmə ilə yanaşı, Azərbaycan dili təlimləri də keçiriləcək. Layihənin növbəti mərhələsində isə yerli şagirdlərin İsveçrəyə səfəri təşkil ediləcək.
Azərbaycan Respublikasının Gənclər və İdman Nazirliyi layihənin tərəfdaşlarından biridir.
Qeyd edək ki, Azərbaycan Prezidenti İlham Əliyev Dünya Azərbaycanlılarının V Qurultayında çıxışı zamanı həftəsonu məktəblərinin açılması istiqamətində fəaliyyətin gücləndirilməsi, dünya azərbaycanlılarını birləşdirən ana dilinin daim təbliği kimi fəaliyyətləri diaspor siyasətinin prioritet istiqaməti kimi müəyyənləşdirib.
Xarici ölkələrdə “Qarabağ məktəbləri”nin qurulmasına Birinci vitse-prezident xanım Mehriban Əliyevanın təşəbbüsü və tapşırığı ilə start verilib. Fransanın Nant, İsveçrənin Bern, Polşanın Varşava, İsveçin Stokholm şəhərlərində həftəsonu məktəbləri fəaliyyətə başlayıb. Bu məktəblərin məqsədi azərbaycanlı uşaqlara ana dilini, ədəbiyyatını, tarixini və mədəniyyətini tədris etməklə yanaşı, ölkəmizlə bağlı həqiqətləri də aşılamaqdır.