Bakı, 31 yanvar (AZƏRTAC - C.Rüstəmov). Yanvarın 30-dan başlayaraq respublika ərazisində hava şəraiti kəskin dəyişmişdir. Şaxtalı və qarlı hava həftənin sonunadək davam edəcəkdir. AZƏRTAC-ın müxbiri mövcud hava şəraiti ilə əlaqədar ölkənin nəqliyyat infrastrukturunun işində yaranmış vəziyyətlə maraqlanmışdır.

Beynəlxalq Avtovağzal Kompleksindən bildirmişlər ki, ümumiyyətlə, son günlər ərzində sərnişinlərin sayında azalma müşahidə olunur. Bölgələrdən və beynəlxalq istiqamətlərdən avtobuslar son məntəqəyə gecikmələrlə gəlib çatır. Hələlik hansısa ciddi problem yaranmamışdır. Hər bir marşrut avtobuslarla təmin olunmuşdur.

Hava şəraiti ilə əlaqədar bütün nəqliyyat vasitələrinin sahiblərinə qabaqlayıcı tədbirlər görülməsinə dair göstəriş verilmişdir. Avtobuslar yola çıxmazdan əvvəl texniki baxışdan keçirilir. Eyni zamanda, yollardakı vəziyyətlə bağlı Baş Dövlət Yol Polisindən mütəmadi məlumatlar alınır. Bu məlumatlar dərhal sürücülərə ötürülür və alternativ yollardan istifadə olunmasına dair göstəriş verilir. Hazırda Ağsu-Şamaxı-İsmayıllı yolu istisna olmaqla, sürücülər alternativ yollardan istifadə edirlər.

Bu günlər yol işçiləri də gücləndirilmiş rejimdə çalışırlar. “Azəryolservis” ASC-nin mətbuat xidmətinin rəhbəri Pünhan Mürsəliyev demişdir ki, yolların buz bağlamasının qarşısının alınması, həmçinin respublikanın, o cümlədən paytaxtın avtomobil yollarında nəqliyyatın fasiləsiz hərəkətini təmin etmək məqsədi ilə qurum tərəfindən lazımi tədbirlər görülür. ASC-nin bütün istismar idarələri hava şəraitinin dəyişməsi ilə əlaqədar zəruri material və mexanizmlərlə təmin edilmişdir. Yollarda problemlərin aradan qaldırılması məqsədi ilə respublika üzrə, ümumilikdə, 25 min kubmetrə yaxın qum, 1500 ton texniki duz tədarük olunmuş və 1100-ə yaxın texnika tam hazır vəziyyətə gətirilmişdir.

Yanvarın 30-da gecədən başlayaraq texnikalar yolların qardan təmizlənməsinə səfərbər olunmuşdur. Bəzi səriştəsiz sürücülər qarlı hava şəraitində nəqliyyat vasitələrini lazımi səviyyədə idarə edə bilmədiklərindən həm digər avtomobillərə, həm də yollarda aparılan təmizlik işlərinə mane olurlar. Lakin çətinliklərə baxmayaraq, yolların təmizlənməsi davam etdirilir. Qurumun yol-istismar idarələri bu gecə də yolların təmizlənməsi ilə məşğul olacaqlar.

Nəqliyyat Nazirliyinin qış qarajındakı bütün texnikalar paytaxtda yolların təmizlənməsinə səfərbər olunmuşdur. Eyni zamanda, nazirlikdə hava şəraiti ilə əlaqədar mərkəzi qərargah yaradılmışdır. İstər regionlarda, istərsə də Bakıda lazımi tədbirlər həyata keçirilir. Hər bir yol-istismar idarəsində 24 saat fəaliyyət göstərən növbətçilik təşkil olunmuşdur.

Ölkənin polad magistralında da hərəkət dayanmamışdır. Yanvarın 31-də qarlı-şaxtalı hava şəraitinə baxmayaraq Bakı-Moskva, Bakı-Ağstafa-Qazax, Bakı-Astara-Horadiz, Bakı-Böyük Kəsik, Bakı-Köçərli-Balakən sərnişin qatarları cədvələ uyğun olaraq mənzil başına çatmışdır.

Bakı-Tbilisi sərnişin qatarının müəyyən gecikmə ilə Bakı sərnişin stansiyasına çatdığını deyən “Azərbaycan Dəmir Yolları” Qapalı Səhmdar Cəmiyyətinin mətbuat katibliyinin rəisi Nadir Əzməmmədov qeyd etmişdir ki, bəzi qısamüddətli gecikmələri nəzərə alınmazsa, qatarların qəbulu və yola salınması müəyyən olunmuş cədvələ uyğun həyata keçirilir.

Ümumiyyətlə, QSC-nin kollektivi hava şəraitinin əlverişsiz olması ilə əlaqədar gücləndirilmiş iş rejiminə keçmişdir. Sərnişinlərin və qatar heyətlərinin təhlükəsizliyinin təmin edilməsi məqsədi ilə bir sıra tədbirlər görülür. Dəmir yolunun rels bərkidicilərinə, relslər arasındakı məsamələrə, siqnal və enerji təchizatı sistemlərinə gün ərzində bir neçə dəfə baxış keçirilir. QSC-nin sərnişin daşımaları departamenti tərəfindən sərnişin vaqonlarının istilik sisteminin normal işləməsinə ciddi nəzarət olunur.

Hava şəraiti ilə əlaqədar sərnişinlər rahat və qiymət baxımından daha münasib nəqliyyat vasitəsi kimi dəmir yolunun xidmətlərindən daha çox istifadə edirlər. Sərnişin axını nəzərə alınaraq qatarlara əlavə vaqonların qoşulması təmin olunur. Qərb istiqamətinə hərəkət edən sərnişin qatarlarına yanvarın 31-də əlavə 14 vaqon qoşulmuşdur.

Bakıda gecədən başlayan güclü çovğun Heydər Əliyev Beynəlxalq Aeroportunun fəaliyyətinə də ciddi təsir etməmişdir.

Aeroportdan bildirmişlər ki, təyyarələrin qəbulu və yola salınması gün ərzində normal rejimdə davam etmişdir. Yalnız Rusiyadakı hava şəraiti ilə əlaqədar “Aeroflot” aviaşirkətinin Moskva-Bakı reysi müəyyən gecikmə ilə qəbul olunmuşdur. Digər yerli və beynəlxalq aviareyslərdə hər hansı problem yaşanmamışdır. Ehtiyac yaranacağı təqdirdə aeroportun enmə və qalxma zolaqlarının təmizlənməsi üçün kifayət qədər texnika hazır vəziyyətdə saxlanılır.

Havanın kəskin soyuması, yolların buz bağlaması səhər saatlarında paytaxtda sərnişin daşınmasında bəzi çətinliklər yaratmışdır.

Nəqliyyat Nazirliyinin mətbuat katibliyindən bildirmişlər ki, səhər saatlarında Sumqayıt, Əhmədli, Günəşli, Yasamal istiqamətlərində hərəkət edən ictimai nəqliyyatın işində çətinliklər yaransa da, qısa müddətdə bu problemlər aradan qaldırılmışdır.

Bakı Şəhər İcra Hakimiyyətinin, Nəqliyyat Nazirliyinin və yol polisinin birgə tədbirləri nəticəsində paytaxt ərazisinin avtomobil yollarının böyük əksəriyyətinin gün ərzində qardan təmizləndiyini deyən Bakı Şəhər Baş Polis İdarəsinin Baş Dövlət Yol Polisi İdarəsinin ictimaiyyətlə əlaqələr şöbəsinin rəisi Vaqif Əsədov vurğulamışdır ki, müvafiq qurumların səyi nəticəsində Xocasən-Sumqayıt istiqamətində avtomobillərin hərəkətində yaranan problem aradan qaldırılmışdır.

V.Əsədov məlumat vermişdir ki, Xocasən-Sumqayıt istiqamətində avtomobillərin hərəkətində yaranan problemə səbəb üç yük avtomobilinin sürücülərinin səhlənkarlığı nəticəsində baş verən yol qəzası olmuşdur. Qəza nəticəsində texniki cəhətdən nasaz olan avtomobillər dəmir maneələrə çırpılaraq yolu bağlamışdı. Həmin avtomobillər yolun hərəkət hissəsindən kənarlaşdırılmışdır.