Qubada respublika elmi konfransı: Mirzə Hüseyn Əfəndi Qayıbzadə-195
Quba, 23 dekabr, Elxan Yusifli, AZƏRTAC
Azərbaycan Dövlət Pedaqoji Universitetinin (ADPU) Quba filialında respublikanın aparıcı ali təhsil və elmi müəssisələrinin alim və tədqiqatçılarının iştirakı ilə görkəmli maarifçi və ədəbiyyatşünas Mirzə Hüseyn Əfəndi Qayıbzadənin anadan olmasının 195 illik yubileyinə həsr edilmiş respublika elmi konfransı keçirilib.
AZƏRTAC-ın bölgə müxbiri xəbər verir ki, “Hüseyn Əfəndi Qayıbzadə irsi: ənənə və maarifçilik kontekstində” mövzusunda respublika elmi konfransını Azərbaycan Dövlət Pedaqoji Universiteti, ADPU-nun Quba filialı, Azərbaycan İlahiyyat İnstitutu, AMEA-nın Mərkəzi Elmi Kitabxanası, Nizami Gəncəvi adına Milli Azərbaycan Ədəbiyyatı Muzeyi, Xəzər Universiteti və Bakı İlahiyyat Kolleci birgə təşkil ediblər.
ADPU Quba filialının direktoru, professor Yusif Alıyev çıxışında Qafqaz müftisi, görkəmli maarifçi və ədəbiyyatşünas Mirzə Hüseyn Əfəndi Qayıbzadənin həyat və yaradıcılığı, pedaqoji və ictimai fəaliyyəti haqqında ətraflı məlumat verib. Bildirilib ki, Mirzə Hüseyn Əfəndi Qayıbzadə dövrünün görkəmli ziyalılarından biri kimi qayğıkeş müəllim, publisist, yorulmaz ədəbiyyatşünas və ictimai xadim olub. O, məktəblər açmaqla, gənclərə dəstək göstərməklə və biliyə yiyələnmək istəyənlərə yardım etməklə maarifçiliyin inkişafına mühüm töhfələr verib.
Quba Rayon İcra Hakimiyyəti başçısının birinci müavini Tariyel İbrahimov çıxışında Mirzə Hüseyn Əfəndi Qayıbzadənin həyat və fəaliyyətinin ayrı-ayrı məqamlarına toxunub. O, Azərbaycanda görkəmli şəxsiyyətlərin, o cümlədən xalqın maariflənməsində böyük xidmətləri olan ziyalıların xatirəsinin əbədiləşdirilməsi istiqamətində görülən işləri yüksək dəyərləndirib. Bu sahədə Ümummilli Lider Heydər Əliyevin müəyyən etdiyi siyasətin Prezident İlham Əliyev tərəfindən uğurla davam etdirildiyi vurğulanıb. Qeyd olunub ki, Mirzə Hüseyn Əfəndi Qayıbzadənin tarixi missiyasının gənc nəsillərə olduğu kimi çatdırılması xalqımızın şərəfli tarixinə və işıqlı gələcəyinə göstərilən ehtiramın ifadəsidir.
Xəzər Universitetinin təsisçisi, Direktorlar və Qəyyumlar Şurasının sədri, professor Hamlet İsaxanlı və “Odlar Yurdu” Universitetinin “Filologiya və humanitar fənlər” kafedrasının müdiri professor Rüstəm Kamal çıxış edərək Mirzə Hüseyn Əfəndi Qayıbzadənin həyat və yaradıcılığı, pedaqoji fəaliyyəti barədə fikirlərini bölüşüb, onun Azərbaycan maarifçiliyindəki tarixi rolunu böyük milli irs kimi dəyərləndiriblər.
Professor Abbasqulu Nəcəfzadə “Hüseyn Əfəndi Qayıbzadənin “Mirzə Hüseyn Segahı” muğamı”, dosent Əhməd Niyazov isə “Hüseyn Əfəndi Qayıbzadənin elmi-ictimai rolu: İsmayıl Qaspıralıya göndərdiyi fitva məzmunlu məktubu əsasında” mövzularında elmi məruzələrlə çıxış ediblər.
Elmi konfransın açılış mərasiminin bədii hissəsində Xəzər Universitetinin kamera orkestrinin ifasında musiqi proqramı təqdim olunub.
Konfransda, həmçinin filialın Kitabxana və elektron resurslar şöbəsinin müdiri Samirə Hacıyevanın təşkilatçılığı ilə hazırlanmış və qiymətli kitablardan ibarət sərgi də nümayiş etdirilib.
Daha sonra konfrans panel iclasla davam etdirilib. Panel iclaslarında Azərbaycan xalqının zəngin tarixi keçmişi, kütləvi savadsızlığın aradan qaldırılması istiqamətində müxtəlif dövrlərdə görülən işlər, milli şüurun inkişafına qarşı tətbiq olunan müqavimətlər, həmçinin müasir təhsil sisteminin aktual problemləri ilə bağlı elmi məruzələr dinlənilib və geniş müzakirələr aparılıb. Konfransda tələbələr və gənc tədqiqatçılar da fəal iştirak ediblər.
Konfransın sonunda iştirakçılara sertifikatlar təqdim olunub, tədbirin materiallarının elmi toplu şəklində nəşr olunmasının nəzərdə tutulduğu bildirilib.
Bölmənin digər xəbərləri
