Respublika üzrə kümçülərə ipəkqurdunun paylanmasına başlanılıb
Qax, 7 may, AZƏRTAC
Mayın 7-də Qax Damazlıq İpəkçilik Stansiyasında kümçülərə ipəkqurdunun paylanması prosesinə start verilib. Stansiyada iki gün ərzində 36 rayonun kümçülərinə ipəkqurdunun paylanması nəzərdə tutulur.
AZƏRTAC-ın bölgə müxbiri Qax Damazlıq İpəkçilik Stansiyasında olub, ipəkqurdlarının paylanması prosesi ilə maraqlanıb.
Stansiyanın direktoru Əkrəm Fətəliyev bildirib ki, builki mövsümdə respublikanın 40 rayonunda, həmçinin Naxçıvan Muxtar Respublikasının rayonlarında barama yetişdiriləcək. Direktorun sözlərinə görə, bu il Çindən ölkəmizə 6040 qutu hibrid ipəkqurdu sənaye toxumu (qrena) gətirilib. Bundan əlavə, Qax Damazlıq İpəkçilik Stansiyasında yerli istehsal hesabına 451 qutu hibrid sənaye tut ipəkqurdu toxumu da hazırlanıb. Beləliklə, bu il kümçülərə əvəzsiz olaraq 6491 qutu ipəkqurdunun paylanması nəzərdə tutulur.
İpəkqurdu toxumunun inkubasiyası Qax Damazlıq İpəkçilik Stansiyası ilə yanaşı, Zərdab və Zaqatala rayonlarındakı baramaqurutma müəssisələrində də həyata keçirilib. Zərdabda 800, Zaqatalada isə 450 qutu ipəkqurdu toxumu inkubasiyaya qoyulub. Naxçıvana 50 qutu ipəkqurdu toxumu göndərilib.
Stansiyada ipəkqurdunun paylanması prosesi rayonların icra hakimiyyətləri və Dövlət Aqrar İnkişaf mərkəzlərinin (DAİM), həmçinin “Azəripək” ASC-nin nümayəndələrinin iştirakı ilə həyata keçirilir.
Füzuli Rayon İcra Hakimiyyəti başçısının müavini Vüqar Teymurov AZƏRTAC-ın bölgə müxbirinə bildirib ki, builki mövsümdə rayonun kümçülərinə 200 qutu və ya 3 kiloqram 800 qram ipəkqurdu toxumu paylanılacaq. İpəkqurdunun yemlənməsi ilə 80-dək kümçü ailəsi məşğul olacaq. Cari mövsümdə rayonda yaş barama istehsalının 8 tona çatdırılması proqnozlaşdırılır. Ötən il isə füzulili kümçülər 7 ton 252 kiloqram yaş barama istehsal ediblər.
Bərdə Rayon İcra Hakimiyyətinin nümayəndəsi Damət Ələkbərovun sözlərinə görə, stansiyada ipəkqurdunun paylanması prosesi yaxşı təşkil olunub. Əməkdaşlar rayonlardan gələn nümayəndələrə kömək göstərirlər. Bölgüyə əsasən, bu il Bərdə rayonuna 400 qutu ipəkqurdu toxumu ayrılıb. Cari mövsümdə rayonda yaş barama istehsalının 16 tona çatdırılması hədəflənir.
Ümumiyyətlə, stansiyada ilkin olaraq 7 rayonun – Lənkəran, Astara, Bərdə, Füzuli, Sabirabad, Samux və Zəngilan rayonlarının kümçülərinə 1070 qutu ipəkqurdu paylanıb.
Müxbir – Mustafa Dadaşov
Bölmənin digər xəbərləri
