RUSİYA AZƏRBAYCANIN ƏRAZİ BÜTÖVLÜYÜNÜ DƏSTƏKLƏYİR
Rusiya “Azərbaycanın ərazi bütövlüyü prinsipini dəstəkləyir”. Bu barədə RF XİN-in rəsmi nümayəndəsinin müavini Boris Malaxov avqustun 11-də Dağlıq Qarabağda keçirilməsi nəzərdə tutulan qondarma “prezident seçkiləri” ilə əlaqədar bəyan etmişdir.
İTAR-TASS-ın verdiyi xəbərə görə, Boris Malaxov bildirmişdir ki, Moskva “Dağlıq Qarabağı müstəqil dövlət kimi tanımır”. Rusiya diplomatının sözlərinə görə, “onun gələcək statusu güc tətbiq olunmadan, Minsk prosesi çərçivəsində bütün tərəflər arasında siyasi danışıqlar nəticəsində müəyyən edilməlidir”.
Boris Malaxov bunu da vurğulamışdır ki, “Moskvada hesab etmirlər ki, münaqişənin sülh yolu ilə nizama salınması Qarabağda seçkilər keçirilməsindən asılı ola bilər”.
XİN-in rəsmi nümayəndəsinin müavini demişdir ki, Rusiya “Qarabağ məsələsinin güzəştli həllini tapmaqda azərbaycanlılara və ermənilərə bundan sonra da kömək edəcəkdir”. Rusiya tərəfi bu məqsədə nail olmaq üçün ATƏT-in Minsk qrupundakı həmsədr tərəfdaşları ABŞ və Fransa ilə sıx qarşılıqlı əlaqədə işləmək niyyətindədir.
Bölmənin digər xəbərləri
