DÜNYA
RUSİYA HEROİN SATIŞI VƏ İSTEHLAKI ÜZRƏ MÜTLƏQ DÜNYA LİDERİ OLMUŞDUR
Moskva, 20 fevral (AZƏRTAC). Narkotiklərin Dövriyyəsinə Federal Nəzarət Xidmətinin (NDFNX) direktoru Viktor İvanov Dövlət Dumasında keçirilmiş Əfqanıstandan narkotrafik gətirilməsi ilə bağlı “dəyirmi masa”da demişdir: “Rusiya son illərdə heroinin satışı və istehlakı üzrə mütləq dünya lideridir”.
Onun dediyinə görə, opiatlar qəbul edən rusiyalıların faizi Avropa İttifaqına daxil olan ölkələrdə müvafiq göstəricidən 5-8 dəfə çoxdur. Rusiyada opiatları (xüsusən heroini) narkotiklərdən asılı olanların 90 faizə qədəri qəbul edir. V.İvanov vurğulamışdır ki, bütün heroin yalnız Əfqanıstan mənşəlidir. Onun verdiyi məlumata görə, qaçaqmal yolu ilə Əfqanıstandan Rusiyaya azı 12 ton xalis heroin gətirilir, bu isə 3 milyard birdəfəlik doza deməkdir. V.İvanovun dediyinə görə, ölkədə sutkada heroin qəbulundan çağırış yaşlı 82 nəfər, hər il isə 30 min nəfər ölür. Bununla bərabər, müxtəlif mülahizlərə görə, Əfqanıstanda anbarlarda olan xalis heroinin həcmi 2-3 min tondur.
NDFNX-nin rəhbəri vurğulamışdır ki, ABŞ və NATO-nun hərbi kontingentləri Əfqanıstana yeridildikdən sonra 2001-ci ildən 2008-ci ilədək opiatların istehsalı 44 dəfə artmışdır. V.İvanov demişdir: “Rusiyanı narkotikləşdirmək sahəsində ABŞ və NATO-nu məqsədyönlü tədbirlər görməkdə əsla təqsirləndirmirik, bununla belə, ölkəmizi ağzına almış faktik narkotik axınlarına görə, biz Əfqanıstanda baş verənlər üçün məsuliyyəti öz üzərinə götürənlərin ən azı fəaliyyətsizliyi haqqında nəticə çıxarmağa borcluyuq”.
Asya Hacızadə
AZƏRTAC-ın xüsusi müxbiri
Moskva