Rusiya XİN Qarabağ ətrafında və Ermənistandakı vəziyyətlə bağlı bəyanatla çıxış edib
Moskva, 25 sentyabr, AZƏRTAC
Rəsmi İrəvanın 2020-ci il noyabrın 9-dan sonra erməni hərbi birləşmələrinin Qarabağda qalmasını inadla inkar etməsi sentyabrda yaranan son gərginliyin əsas səbəblərindən biri olub.
AZƏRTAC xəbər verir ki, bu barədə Rusiya XİN-in Qarabağ ətrafında və Ermənistandakı vəziyyətlə bağlı bəyanatında bildirilir.
Bəyanatda qeyd olunur ki, Ermənistanın Baş naziri Nikol Paşinyanın sentyabrın 24-də müstəqilliklə bağlı müraciəti “Rusiyanın ünvanına yolverilməz ittihamları ehtiva edir və məsuliyyətdən yayınmaqdan başqa bir şey deyil”. Rusiya XİN hesab edir ki, erməni tərəfi daxili və xarici siyasətdə uğursuzluqlara görə məsuliyyətdən yaxa qurtarmağa və təqsiri Moskvanın üzərinə qoymağa çalışır. Sənəddə deyilir: “Hökumət başçısı mahiyyət etibarilə etiraf etdi ki, bütün bu vaxt ərzində respublikanı şüurlu şəkildə Rusiyadan üz çevirməyə hazırlayıblar. Ermənistanın inkişafının yeni - Qərb vektoruna yönəlmiş addımlara inandırıcı olmayan şəkildə guya Rusiya Federasiyası və KTMT-nin buraxdığı səhvlərlə bəraət qazandırılır. Bu halda unudulur ki, dövlətlərimizin bir çox hallarda təhlükəsizlik və inkişaf məsələlərində oxşar maraqları var, ABŞ və NATO-nun digər ölkələri isə öz qarşılarına təkcə Rusiyaya strateji zərər vurmağı deyil, həm də bizim ortaq Avrasiya məkanında sabitliyi pozmaq məqsədini qoyublar.
Rusiya XİN xüsusi olaraq vurğulayır ki, rəsmi İrəvanın 2020-ci il noyabrın 9-dan sonra erməni hərbi birləşmələrinin Qarabağda qalmasını inadla inkar etməsi sentyabrda yaranan son gərginliyin əsas səbəblərindən biri olub. Bəyanatda deyilir: “RSK-nin vasitəçiliyi ilə sentyabrın 20-də Ermənistanın qalan birləşmələrinin çıxarılması və ağır texnikanın və silah-sursatın təhvil verilməsi ilə “Dağlıq Qarabağ ordusunun” tam tərk-silah edilməsi üzrə əldə olunmuş razılaşma real mənzərəni göstərdi və dayanıqlı de-eskalasiya üçün şərait yaratdı” .
RF-in xarici siyasət idarəsinin bəyanatında qeyd olunub: “Erməni rəhbərliyinin ardıcıl olmayan siyasəti nəticəsində Rusiya və Azərbaycanla ritmik şəkildə işləmək yerinə, Qərbə tərəf üz tutmağa üstünlük verildi, bununla da 2020-2022-ci illərdə yüksək səviyyədə əldə olunmuş üçtərəfli razılaşmalar kompleksinin həyata keçirilməsi dayandı. Sülh sazişinin razılaşdırılması, sərhədlərin delimitasiyası və regional kommunikasiyaların açılması üzrə ciddi irəliləyiş əldə edilməsinin mümkün olduğu qiymətli vaxt itirildi ki, bunlar da Ermənistan üçün təhlükəsizliyin təmin edilməsində əlavə faktorlar ola bilərdi”.
Rusiya XİN bildirir ki, Moskva atəşkəs rejiminə əməl edilməsi üzrə əlverişli şəraitin yaradılması, humanitar vəziyyətin yaxşılaşması, Bakı ilə Xankəndi arasında dayanıqlı dialoqun aparılmasından söhbət gedərkən, rəsmi İrəvanın Qarabağdakı “mühüm problemlərin həllinə kömək edilməsi üzrə ciddi marağını” müşahidə etmir.
Nazirlikdə, həmçinin Moskvanın son günlər İrəvanda keçirilən mitinqlərə aidiyyəti olduğunu inkar edir.
Bəyanatda vurğulanıb: “Əminik ki, İrəvandakı rəhbərlik Ermənistanla Rusiya arasında çoxsahəli və çoxəsrlik əlaqələri şüurlu şəkildə pozmağa cəhd edərək ciddi səhvə yol verir və ölkəni Qərbin geosiyasi oyunlarının girovuna çevirir. Əminliklə bildiririk ki, erməni əhalinin əksəriyyəti bunu başa düşür”.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
