SAMUXLULAR BİRİNCİ RÜBDƏ UĞURLU NƏTİCƏLƏR QAZANMIŞLAR
AZƏRTAC-ın müxbiri xəbər verir ki, 2008-ci ilin birinci rübünün yekunları ilə bağlı Samux rayonunda müşavirə keçirilmişdir.
Müşavirədə rayon icra hakimiyyətinin başçısı Vilyam Hacıyevin son üç ayda rayonda sosial-iqtisadi sahədə qazanılan uğurlardan və qarşıda duran vəzifələrdən bəhs edən məruzəsi dinlənilərək müzakirə edilmişdir.
Müzakirələr zamanı bildirilmişdir ki, cari ilin birinci rübü rayonun tarixində yaddaqalan hadisələrlə zəngin olmuş, respublika Prezidenti İlham Əliyevin mart ayında rayona tarixi səfərinin oyatdığı xoş təəssüratlarla yaşayıb-yaradan samuxlular rübü uğurlu göstəricilərlə başa vurmuşlar. Ötən ilin müvafiq dövrü ilə müqayisədə 33,6 faiz çox məhsul istehsal edilmişdir. Bu göstəricinin 89, 7 faizi qeyri-dövlət sektorunun payına düşmüşdür. Sənaye məhsulunun həcmi 23,3 faiz artaraq 11 min 365 manat, adambaşına düşən gəlir 22 faiz artaraq 99,3 manat təşkil etmişdir. 388 aztəminatlı ailəyə sosial yardım təyin olunmuşdur. Bu dövr ərzində əhalinin məşğulluğu diqqət mərkəzində saxlanılmış, 443 yeni iş yeri açılmışdır ki, onun da 136-sı daimidir.
Məruzəçi və çıxış edənlər rayon mərkəzinin, eləcə də kənd və qəsəbələrin abadlaşdırılması sahəsində xeyli iş görüldüyünü diqqətə çatdırmışlar. Əhalinin qaz, elektrik enerjisi və su ilə təminatı üçün həyata keçirilən tədbirlərdən danışılarkən qeyd edilmişdir ki, 62 kilometrlik yeni kəmərin çəkilməsi nəticəsində qazdan istifadə edən abonentlərin sayı 10 minə çatdırılmışdır. İşlədilən yanacağın haqqı 100 faiz yığılmışdır. Əhalinin fasiləsiz və dayanıqlı elektrik enerjisi ilə təminatı sahəsində də müsbət irəliləyişlərə nail olunmuş 2 min köhnə sayğac yenisi ilə əvəz edilmişdir.
Rayonu iki hissəyə bölən Kür çayı üzərində yeni körpünün salınması üçün layihə-smeta sənədləri təsdiq edilmiş, əkin sahələrinin suvarılması məqsədi ilə Şəmkir maşın kanalında bir nasos tam gücü ilə işə salınmış, ikinci nasosun işə salınması üçün hazırlıq başa çatdırılmışdır.
Müşavirədə görülən işlərlə yanaşı, qarşıda duran vəzifələr də ətraflı təhlil edilmişdir. Rayonda tikinti, quruculuq və abadlıq işləri, yol çəkilişi, yeni sahibkarlıq obyektlərinin açılması ilə işsizliyin aradan qaldırılması kimi məsələlər geniş müzakirə obyektinə çevrilmişdir.
Sonda Prezident Ilham Əliyevə müraciət qəbul olunmuşdur.
Bölmənin digər xəbərləri
