Bakı, 17 oktyabr (AZƏRTAC). Azərbaycan Prezidenti İlham Əliyevin sədrliyi ilə Nazirlər Kabinetinin 2013-cü ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş geniş iclasındakı nitqindən irəli gələn vəzifələr Səbail Rayon İcra Hakimiyyəti başçısı yanında Şuranın iclasında ətraflı müzakirə olunmuşdur.

Rayon icra hakimiyyətindən AZƏRTAC-a bildirmişlər ki, iclasda sənaye, təhsil və səhiyyə müəssisələrinin, təsərrüfat və xidmət sahələrinin, hüquq-mühafizə orqanlarının rəhbərləri, bələdiyyələrin, din xadimlərinin, gənclər təşkilatlarının və rayon ictimaiyyətinin nümayəndələri iştirak etmişlər. İclas iştirakçıları dövlətimizin başçısı İlham Əliyevi növbəti prezident seçkilərində qazandığı inamlı qələbə münasibətilə təbrik etmiş, xalqımızın rifahı və ölkəmizin gələcək inkişafı naminə ali dövlətçilik fəaliyyətində yeni uğurlar arzulamışlar.

İclası giriş sözü ilə açan rayon icra hakimiyyətinin başçısı Asif Əsgərov qeyd etmişdir ki, ölkədə 9 ay ərzində iqtisadiyyat 5 faiz, qeyri-neft sektoru 10,4 faiz, kənd təsərrüfatı 5 faiz, əhalinin pul gəlirləri təxminən 7,6 faiz artmışdır. Ölkənin strateji valyuta ehtiyatları 49,4 milyard dollar təşkil edir ki, bu da Prezident İlham Əliyevin apardığı uğurlu siyasətin nəticəsidir.

Səbail rayonunda görülən işlərdən və əldə olunan nəticələrdən danışan A.Əsgərov bildirmişdir ki, 2013-cü ilin doqquz ayı ərzində 17.566,5 milyon manatlıq və ya əvvəlki ilin müvafiq dövrü ilə müqayisədə 1,7 faiz çox sənaye məhsulu istehsal edilmişdir. Nəqliyyat müəssisələri tərəfindən 408,9 milyon manatlıq və ya keçən illə müqayisədə 1,6 faiz çox, rabitə müəssisələri tərəfindən 471,2 milyon manatlıq və ya keçən ilin müvafiq dövrünə nisbətən 2,1 faiz çox rabitə xidmətləri göstərilmişdir. Bütün maliyyə mənbələri hesabına əsas kapitala 1.263,4 milyon manat investisiya qoyulmuşdur ki, bu da keçən ilin müvafiq dövrünə nisbətən 37,4 faiz çoxdur. Tikinti-quraşdırma işlərinə 2012-ci ilin müvafiq dövrü ilə müqayisədə 4,2 dəfə çox, 1.104,1 milyon manat investisiya yönəldilmişdir.

Hesabat dövründə pərakəndə ticarət şəbəkəsindən əhaliyə 183,3 milyon manat məbləğində istehlak malları satılmış, 219,3 milyon manatlıq pullu xidmət, 61,2 milyon manatlıq iaşə xidmətləri göstərilmişdir. Rayon ərazisində çalışan işçilərin sayı 113398 nəfər, orta aylıq əmək haqqının məbləği 999,1 manat olmuş, 1585 daimi iş yeri açılmışdır. Ümumiyyətlə, 2009-cu ilin yanvarından 2013-cü il oktyabr ayının 1-dək rayonda açılmış daimi iş yerlərinin sayı 10 mindən çoxdur.

A.Əsgərov “2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı” çərçivəsində görülən işlər barədə də ətraflı məlumat vermişdir. Qeyd olunmuşdur ki, ilin ötən 9 ayı ərzində Dövlət Musiqili Komediya Teatrının, 3 saylı Vərəm Əleyhinə Dispanserin, C.Hacıyev adına Uşaq Musiqi məktəbinin, Bibiheybət qəsəbəsindəki mədəniyyət evi və qəsəbə kitabxanasının, iki poliklinikanın, 44 saylı uşaq bağçasının binaları, Dağüstü parkın bir hissəsi əsaslı təmir olunmuş və yenidən qurulmuşdur. Hökumət evinin qarşısındakı ərazidə yeraltı qaraj istifadəyə verilmiş, 20-ci yaşayış sahəsində 35 kilovoltluq iki yeni yarımstansiya şəbəkəyə qoşulmuşdur. Bibiheybət qəsəbəsində post məntəqəsi açılmış, 70 saylı uşaq bağçası üçün iki mərtəbəli əlavə korpus tikilmişdir. Heydər Əliyev Fondu tərəfindən Badamdar qəsəbəsindəki 136 saylı uşaq bağçası əsaslı təmir edilmişdir.

Hazırda rayon ərazisində yerləşən Azərbaycan Xalçası və Xalq Tətbiqi Sənəti Dövlət Muzeyi üçün yeni binanın, Badamdar qəsəbəsində Oksford məktəbi üçün yeni tədris korpusunun, Qurban Abbasov küçəsində yeni iş mərkəzinin tikintisi, veloparkın yaradılması, binaların fasadlarının üzlənməsi, Dənizkənarı Milli parkın Bayraq Meydanı istiqamətində genişləndirilməsi, “Qız qalası”nda bərpa və konservasiya işləri davam etdirilir. Həmçinin Badamdar şossesi boyunca ərazi abadlaşdırılır, bir sıra binaların və tikililərin fasadları təmir olunur və ya yenidən qurulur.

İcra hakimiyyətinin başçısı sakinlərin elektrik enerjisi, təbii qaz, içməli su ilə təminatının yaxşılaşdırılması, əhalinin sosial müdafiəsinin gücləndirilməsi istiqamətində həyata keçirilən tədbirlərdən də söhbət açmışdır. Belə ki, hesabat dövründə 422 ailəyə ünvanlı sosial yardım təyin olunmuş, 750 işaxtaran vətəndaş daimi işlə təmin edilmişdir. Əhalinin imkansız təbəqəsinə vaxtaşırı yardım göstərilmiş, xeyriyyə aksiyaları keçirilmişdir.

İclasda Milli Məclisin deputatı Fuad Muradov, Yeni Azərbaycan Partiyası Səbail rayon təşkilatının sədri, professor Zahid Qaralov və başqaları çıxış etmişlər. İlin ötən 9 ayında görülmüş işlərə nəzər salınmış, qarşıda duran vəzifələrdən bəhs olunmuşdur.

Sonda “Attila” İdman Klubunun dünya və Avropa çempionatlarında qalib gəlmiş və mükafata layiq yerlər tutmuş bir qrup üzvünə və onların məşqçilərinə mükafatlar təqdim edilmişdir.