Səfərbərlik və Hərbi Xidmətə Çağırış üzrə Dövlət Xidməti rəsm müsabiqəsi elan edib
Bakı, 2 aprel, AZƏRTAC
Səfərbərlik və Hərbi Xidmətə Çağırış üzrə Dövlət Xidməti Azərbaycan xalqının ümummilli lideri Heydər Əliyevin anadan olmasının 95-ci ildönümü münasibətilə “Müstəqil Azərbaycanın memarı” adlı rəsm müsabiqəsi elan edir.
Xidmətdən AZƏRTAC-a bildiriblər ki, müsabiqədə 18 yaşadək şəxslər iştirak edə bilərlər. Əsərlər mayın 31-dək Səfərbərlik və Hərbi Xidmətə Çağırış üzrə Dövlət Xidmətinin Aparatının inzibati binasına təqdim olunmalıdır. Hər bir iştirakçı müsabiqəyə bir əsər təqdim edə bilər. İştirakçılar müsabiqəyə A2, A3 formatlarında əsərlər təqdim etməlidirlər. Rəsmlər çərçivəyə salınmalıdır. Çərçivənin şüşəsinin üstünə rəsm müəllifinin adı, soyadı, atasının adı, yaşı, rayon (şəhər), məktəb, sinif yazılmış etiketlər əlavə olunmalıdır.
Müsabiqəyə təqdim olunan işlər geri qaytarılmır və mükafat qazanan əsərlərdən təbliğat, maarifləndirmə məqsədilə istifadə edilə bilər.
İlk üç yerin sahiblərinə müvafiq olaraq, 600, 400 və 300 manat məbləğində mükafat veriləcək.
Müsabiqənin qalibləri Səfərbərlik və Hərbi Xidmətə Çağırış üzrə Dövlət Xidmətinin diplomları ilə təltif olunacaqlar.
Əlavə məlumat almaq üçün Səfərbərlik və Hərbi Xidmətə Çağırış üzrə Dövlət Xidmətinə müraciət etmək olar (Bakı şəhəri Z.Əliyeva küçəsi 30, əlaqə telefonu 493-06-52).
Bölmənin digər xəbərləri
