SİYASƏT
SƏFİR MƏMMƏD ƏLİYEV MÜXALİFƏT MƏTBUATINI YENƏ YALAN XƏBƏRLƏR YAYMAQDA GÜNAHLANDIRIR
SUAL: Azərbaycanda prezidentliyə namizədlərin təbliğat kampaniyası başlamışdır, seçkilər yaxınlaşır. Türkiyədə işləyən, universitetlərdə təhsil alan, müvəqqəti ezamiyyətə gələn vətəndaşlarımızın Konstitusiya hüquqları necə təmin olunacaq?
CAVAB: Hər zaman olduğu kimi, bu seçkilərdə də xaricdə yaşayan, işləyən, təhsil alan vətəndaşlarımızın bütün Konstitusiya hüquqları təmin olunacaqdır. Seçki günü vətəndaşlarımız Ankara səfirliyində və İstanbul konsulluğumuzda səs verə biləcəklər. Səfirliyimiz hər hansı bir namizədin təbliğatını apara bilməz. Seçicilər bu barədə məlumatları televiziya kanallarından, qəzetlərdən, internetdən ala bilərlər. Ancaq daha öncə keçirilən seçkilərin təcrübəsinə istinad edərək deyə bilərəm ki, MSK tərəfindən bizə namizədlərin seçkiqabağı proqramları, plakatlar göndərilir. Biz də bunları səfirliyimizə və baş konsulluğumuza gələn vətəndaşlarımıza təqdim edirik. Hazırda seçicilərimizin qeydiyyatına başlamışıq.
SUAL: Cənab səfir, ölkəmizin müxalifət mətbuatı Sizə xüsusi “diqqət”, “maraq” göstərir. Bunu nə ilə izah edirsiniz?
CAVAB: Bəli, özlərini jurnalist adlandıran, həqiqətdə isə adi terroristdən fərqlənməyən insanların hədəfi olmuşam. Onlar mütəmadi şəkildə yalan yazır, xalqı aldadır, mən isə bu yalanların üstünü açıram. Bu günlər yeni bir yalan yayıblar. Guya mərhum Əbülfəz Elçibəy Türkiyədə müalicə olunanda mən bu məsələ ilə maraqlanmamışam. Bu, tamamilə cəfəngiyat və böhtandır. Əbülfəz Elçibəy Türkiyə Demokratiya Vəqfində çıxışında da buraya səfəri zamanı dövlətimiz və səfirliyimiz tərəfindən heç bir maneə görmədiyini vurğulamışdı. O, burada müalicə olunarkən bir neçə dəfə xəstəxanaya getmişəm. Gülhanə Hərbi Tibb Akademiyasının rəhbərliyi ilə görüşüb, müalicənin gedişi ilə mütəmadi şəkildə maraqlanmışam. Azərbaycan Respublikasının Prezidenti Heydər Əliyevin tapşırığı ilə həkimlərlə görüşmüşəm. Nə kömək göstərə biləcəyimiz barədə, bəlkə başqa ölkədə müalicənin daha səmərəli olacağı haqqında dövlətimizin rəsmi təkliflərini çatdırmışam. Əbülfəz Elçibəy vəfat etdiyi zaman Prezidentimiz tərəfindən xüsusi təyyarə göndərilməsi haqqında da təkliflərimizi vermişdik. Mərhumu Bakıya aparan təyyarədə də məhz mən olmuşam. Bununla əlaqədar bütün rəsmi işlər də səfirliyimiz tərəfindən görülmüşdür. Ancaq bu şəxslər o zaman da mərhumun xəstəliyi haqqında ailəsinə yalanlar söyləyir, ictimaiyyətimizə də yalan xəbərlər çatdırırdılar. Ümumiyyətlə, bunlar o qədər yalan söyləyirlər ki, özləri də bu yalanların içindən çıxa bilmirlər.
Onlara müraciətlə deyirəm: dəstəklədiyiniz namizədin proqramını meydana çıxarın. İqtidarın səhvi varsa, bunu söyləyin. Nə iş görəcəksiniz, necə görəcəksiniz - bunun yollarını açıqlayın. Amma bütün bunları söyləmək üçün zəka, dərin dövlət təcrübəsi, geniş dünyagörüşü olmalıdır.
Bunların seçdiyi yol isə, ölkədə anarxiya yaratmaq, yığışıb mitinqlərdə hay-küy salmaq, insanlara hədə-qorxu gəlmək, ölkə-ölkə, səfirlik-səfirlik gəzib öz həmyerlilərindən şikayət etməkdir. Bunlardan bezib “əl çəkin bizdən, öz problemlərinizi özünüz həll edin” - deyənləri isə, antidemokrat olmaqda günahlandırırlar. Bəzən müəyyən şəxslərdən əl çəkib, dövlətlərdən küsürlər. Bir gün ABŞ, o biri gün Türkiyə hökumətini tənqid edirlər. Bir müəmmalı internet saytı açıblar, yalan uydurub oraya çıxarır, sonra da ona istinad edərək qəzetlərində çap edirlər. Assoşieyted Press, Anadolu Ajansı, İTAR-TASS, AZƏRTAC kimi dünyanın bir çox ölkəsində nümayəndəlikləri olan nüfuzlu agentliklərin xəbərlərinə yox, illərlə Azərbaycanda alverlə məşğul olan, Türkiyəyə gələrək öncə bir televiziya kanalından, sonra da qəzetdən qovulan bir şəxsin məlumatlarına inanırlar.
Mən hər müsahibəmdə deyirəm, bunlar media terroristləridir. Jurnalistlikdən uzaq, sabitliyi pozmaqla, qarışıqlıq yaratmaqla hakimiyyətə gəlməyə çalışanların əlində oyuncağa çevrilmiş bir ovuc bisavad insandır. İnanıram ki, xalqımız bu kələkbazlara da layiqli cavab verəcəkdir.