Şəhidin atası: Sergey gənc hərbi qulluqçu kimi missiyasını uğurla tamamladı
Bakı, 26 sentyabr, AZƏRTAC
Sergeyi sonuncu dəfə 2023-cü ilin avqustunda gördük. Məzuniyyətə gəlmişdi. Avqustun 27-də isə geri qayıtdı. Onunla sonuncu dəfə həmin il sentyabrın 19-da danışdıq. Elə həmin gün axşamçağı antitteror əməliyyatlarında Xocalı-Xankəndi istiqamətində gedən döyüşlərdə şəhid oldu…
Bunu AZƏRTAC-a açıqlamasında antiterror əməliyyatları zamanı şəhid olan, Azərbaycan Ordusunun müddətdən artıq həqiqi hərbi xidmət hərbi qulluqçusu Sergey Heybətovun atası Ramin Heybətov deyib.
“Sergey həqiqi hərbi xidməti 2021-ci ildə Hadrutdakı “N” saylı hərbi hissədə komando briqadasının tərkibində keçib. O, əslində məktəb dövründən hərbiyə həvəs göstərirdi. Hərbi hazırlıq fənninə xüsusi maraq göstərirdi. Əsgərlik dövründə artıq qərarını qətiləşdirdi və həqiqi hərbi xidməti bitirdikdən sonra Azərbaycan Ordusunda qalmağı seçdi. Antiterror əməliyyatları başlayanda o, artıq 6 ay idi ki, komando hərbi hissəsində müddətdən artıq həqiqi hərbi xidmət hərbi qulluqçusu kimi xidmət edirdi. Uzun illər Vətənə xidmət etməyi arzulayırdı. Lakin 20 yaşında şəhadətə yüksəlməsi onun da, bizim də arzularımızı yarımçıq qoydu. Sergey gənc hərbi qulluqçu kimi öz missiyasını uğurla tamamladı”, - deyə Ramin Heybətov bildirib.
Şəhidin atasının sözlərinə görə, Sergey döyüşlərdən əvvəl xalası oğlu Rizvana vacib işin arxasınca getdiyini, lakin sonunda onu nə gözlədiyini bilmədiyini yazıb: “Hər şey yaxşı olacaq. Heç kimə deməmişəm, vacib bir işim var. Ya gedəcəyəm, ya da qalacağam. Heç kim bilmir. Çıxsam, sənə yazacağam…”.
Ramin Heybətov diqqətə çatdırıb ki, Sergey Azərbaycan-Türkiyə birgə təlimlərində, həmçinin digər təlim və kurslarda iştirak edib, hərbi xidməti dövründə fərqlənib. “O, dəfələrlə təşəkkürnamələr və fəxri fərmanlarla təltif olunub. Komandirləri deyirdilər ki, Sergey cəsur, təmkinli, iradəli, vətənpərvər, hər bir vəzifəsini dəqiqliklə yerinə yetirən, təlimlərdə və tapşırıqlarda xüsusi fəallıq göstərən, yüksək fiziki hazırlığa malik olan hərbi qulluqçudur. Şəhadəti də onun yüksək şəxsi keyfiyyətlərinin bariz göstəricisidir. Sergey qısa ömrünə bu cür uğurları sığdırmağı bacardı. Ondan bizə geriyə qalan qürur, dərin hüzn və ağrıdır”, - deyə şəhidin atası fikirlərinə yekun vurub.
Xatırladaq ki, Sergey Ramin oğlu Heybətov Azərbaycan Respublikası Prezidentinin sərəncamları ilə ölümündən sonra 3-cü dərəcəli “Vətənə xidmətə görə” ordeni və “Vətən uğrunda” medalı ilə təltif olunub. O, doğulub boya-başa çatdığı Qusar rayonunun Ukur kəndindəki qəbiristanlıqda torpağa tapşırılıb.
Bölmənin digər xəbərləri
