SƏHİYYƏ İŞÇİLƏRİ PEŞƏ BAYRAMLARINI QEYD ETMİŞLƏR
AZƏRTAC xəbər verir ki, iyunun 17-də səhiyyə işçiləri peşə bayramını qeyd etmişlər.
Tibb ictimaiyyətinin nümayəndələri Fəxri xiyabana gələrək, ümummilli lider Heydər Əliyevin xatirəsini yad etmiş, ulu öndərin məzarı önunə əklil qoymuşlar.
Tanınmış oftalmoloq-alim, akademik Zərifə xanım Əliyevanın da məzarı üstünə tər güllər düzülmüşdür.
Bayram münasibətilə Azərbaycan Tibb Universitetində təşkil olunmuş tədbirdə nazir Oqtay Şirəliyev bütün tibb işçilərini təbrik etdi. Azərbaycanda səhiyyə sahəsinin keçdiyi inkişaf yolundan söz açan nazir ümummilli lider Heydər Əliyevin rəhbərliyi ilə hələ ötən əsrin 70-80-ci illərində bu sahədə əldə edilmiş nailiyyətlərdən danışmışdır.
O.Şirəliyev bildirmişdir ki, ulu öndərin siyasi xəttinin layiqli davamçısı İlham Əliyev tərəfindən xalqımızın sağlamlığı və rifahı naminə həyata keçirilən tədbirlər uğurla davam etdirilir.
Nazir vurğulamışdır ki, Azərbaycan dövləti tibb sahəsində çalışan işçilərin əməyini daim qiymətləndirmişdir.
Ölkəmizdə səhiyyənin dünən və bugünkü vəziyyəti, keçdiyi inkişaf tarixini əks etdirən videoçarx nümayiş etdirilmişdir.
Azərbaycanda səhiyyə sahəsində göstərdiyi xidmətlərə görə Prezident İlham Əliyev tərəfindən “Tərəqqi” medalı və fəxri adlarla təltif olunan şəxslərə dövlət mükafatları təqdim edilmişdir.
Sonda səhiyyə işçiləri Prezident İlham Əliyevə müraciət qəbul etmişlər.
Bölmənin digər xəbərləri
