İQTİSADİYYAT
ŞƏMKİRLİLƏR UĞURLARI 2008-Cİ İLDƏ DAHA DA ARTIRMIŞLAR
Şəmkir, 20 fevral (AZƏRTAC). 2008-ci il şəmkirlilər üçün uğurlu göstəricilərlə yadda qalmışdır. Ölkə prezidenti İlham Əliyev tərəfindən qarşıya qoyulmuş vəzifələr və regionların sosial-iqtisadi inkişafı Dövlət Proqramında nəzərdə tutulmuş tədbirlər vaxtında icra olunmuş, bununla da rayon iqtisadiyyatının yüksəlişi təmin edilmişdir. Ötən il 3937 yeni iş yeri açılmış, 225 milyon 42 min manatlıq, yəni əvvəlki ildəkinə nisbətən 14 faiz çox məhsul buraxılmışdır. Orta aylıq əmək haqqı 31,7 faiz artaraq 216 manata çatmışdır. Əmtəə dövriyyəsinin həcmi 152 milyon 279 min manat, başqa sözlə, 2007-ci illə müqayisədə 28,6 faiz çox olmuşdur.
Bütün bu faktlar 2008-ci ilin sosial-iqtisadi yekunları və qarşıda duran vəzifələrə həsr olunmuş ümumrayon müşavirəsində səsləndirilmişdir.
Rayon icra hakimiyyətinin başçısı Nazim Veysov hesabat məruzəsində məlumat vermişdir ki, iqtisadiyyat inkişaf etdikcə rayonda aparılan abadlıq və quruculuq işlərinin həcmi də artmışdır. Şəhərin mərkəzində sahəsi 2,7 hektar olan istirahət parkı, Heydər Əliyev abidə-kompleksi yenidən qurulmuş, H.Əliyev prospekti, bir sıra küçələr abadlaşdırılmış, Şəmkir-Gədəbəy və Zəyəm-Düyərli avtomobil yolları asfaltlaşdırılmışdır. Əmək və əhalinin sosial müdafiəsi mərkəzinin, daşınmaz əmlakın dövlət reyestri xidmətinin rayon ərazi idarəsinin, maliyyə idarəsinin inzibati binaları tikilərək istifadəyə verilmişdir. Ölkə başçısının xeyir-duası ilə təməli qoyulmuş Şəmkir Olimpiya İdman Kompleksində tamamlama işləri gedir. Şəmkir çayı üzərində dəryaçanın tikintisinə start verilmişdir. Qarabağ müharibəsi əlillərinin mənzil-məişət şəraitinin yaxşılaşdırılması məqsədilə 8 və 16 mənzilli iki yaşayış binası, Dəllər qəsəbəsində və Seyfəli kəndində iki fərdi mənzil tikilərək istifadəyə verilmişdir.
2008-ci il rayonda sənaye məhsullarının istehsalı proqnozlaşdırıldığından çox olmuşdur. “Zəyəmkəndmaş” ASC-də 84,4 min manatlıq müxtəlif növ məhsullarla yanaşı, neft-qazma avadanlığı üçün hissələr, məktəb avadanlığı, bəzi məişət əşyalarınin istehsalına başlanmışdır. Bunun sayəsində işçilərin sayı 60 nəfərə çatmışdır.
Müşavirədə qeyd edilmişdir ki, keçən il rayonun kənd təsərrüfatı işçiləri üçün də uğurlu olmuşdur. Onlar 54 min 566 ton taxıl, 102 min 287 ton kartof, 116 min 27 ton tərəvəz, 59 min 570 ton meyvə istehsal etmişlər. Bu, əvvəlki illə müqayisədə xeyli çoxdur. Heyvandarlıq məhsulları istehsalına dair göstəricilər də sevindiricidir. 2007-ci ilə nisbətən ət istehsalı 15 faiz, süd istehsalı 1,8 faiz, yumurta istehsalı isə 30,1 faiz artmışdır.
Məruzəçi təhsil və səhiyyə sahəsində əldə olunan uğurları diqqətə çatdırarkən demişdir ki, regionların sosial-iqtisadi inkişafı Dövlət Proqramı qəbul olunduğu vaxtdan indiyədək rayonda 49 məktəb binası tikilmişdir. Bunların 4-ü Heydər Əliyev Fondunun təşəbbüsü ilə ərsəyə gəlmişdir. Yeddi məktəbdə istilik sistemi qurulmuş, 14-də əsaslı təmir işləri aparılmışdır. Aşağı Seyfəli kəndində 420, Dəllər qəsəbəsində 880, Çinarlı qəsəbəsində 450, Təzəkənd kəndində 960, İrmaşlı kəndində 360, Xanallar kəndində isə 480 yerlik yeni məktəb binalarının tikintisinə başlanmışdır.
Səhiyyə müəssisələrində də yenidənqurma işləri aparılmışdır. Zəyəm qəsəbəsində 10 otaqlıq yeni tibb ocağı tikilmiş, mərkəzi rayon xəstəxanasının cərrahiyyə və burun-boğaz xəstəlikləri şöbəsi əsaslı təmir edilmiş, Kür qəsəbə xəstəxanasının dam örtüyü dəyişdirilmiş, vərəm əleyhinə və dəri-zöhrəvi dispanserində təmir işləri aparılmışdır.
Müşavirədə çıxış edənlər ötən il görülmüş işləri təhlil etmiş, qarşıda duran vəzifələrlə əlaqədar arzu və təkliflərini bildirmişlər.
Tədbirdə Prezidentin İcra Aparatının məsul işçisi Habil Əzənmətov, Milli Məclisin deputatları Mübariz Qurbanlı, Məlahət Həsənova çıxış edərək 2008-ci ildə respublikamızda qazanılan uğurları diqqətə çatdırmış və cari ildə qarşıda duran vəzifələrdən danışmışlar.