SƏNAYE VƏ ENERGETİKA NAZİRLİYİNDƏ GÖRÜŞ
AZƏRTAC xəbər verir ki, İran İslam Respublikasının energetika naziri Pərviz Fəttahın başçılıq etdiyi nümayəndə heyəti iyunun 17-də sənaye və energetika naziri Natiq Əliyevlə görüşmüşdür.
İki ölkə arasında əməkdaşlığın daha da genişləndirilməsi, görüləcək işlər barədə fikir mübadiləsinin aparılması üçün yaxşı imkan yarandığını bildirən Natiq Əliyev demişdir ki, Azərbaycan və İran İslam Respublikası qardaş və qonşu ölkə kimi tarix boyu dostluq şəraitində yaşamışlar. İran ölkəmizin müstəqilliyini bərpa edəndən sonra onu tanıyan ilk ölkələrdəndir.
Natiq Əliyev çətin vaxtlarda İranın respublikamıza yardım əli uzatdığını, qaçqınların və məcburi köçkünlərin problemlərinin həllinə, blokada şəraitində yaşayan Naxçıvan Muxtar Respublikasının elektrik enerjisi və təbii qazla təminatına kömək etdiyini minnətdarlıqla xatırlatmışdır. O, ölkələrimiz arasında iqtisadi-ticari əlaqələrin gündən-günə genişləndiyini, elektrik enerjisi və təbii qaz mübadiləsi sahəsində faydalı əməkdaşlığın davam etdiyini, İranın müvafiq neft şirkətinin “Şahdəniz” layihəsində fəal iştirakını vurğulamışdır. Nazir ötən il dövlət başçılarımızın Tehran görüşü zamanı Azərbaycan, İran və Rusiya arasında enerji mübadiləsinin qaydaya salınması barədə göstəriş verildiyini diqqətə çatdırmış, ötən müddət ərzində bununla əlaqədar müəyyən işlər görüldüyünü, ümumiyyətlə, səmərəli əməkdaşlıq üçün böyük potensialın olduğunu söyləmişdir.
Pərviz Fəttah səmimi qəbul və xoş sözlər üçün minnətdarlığını bildirmiş, həmkarını onun üçün əlverişli vaxtda ölkəsinə dəvət etmişdir. İki ölkə arasında münasibətlərin vəziyyətindən məmnunluğunu ifadə edən qonaq əməkdaşlığın bundan sonra da inkişaf edəcəyinə inandığını vurğulamışdır.
Nazirlər qarşılıqlı maraq doğuran məsələləri müzakirə etmiş, geniş fikir mübadiləsi aparmışlar.
######
Bölmənin digər xəbərləri
