SOSİAL SAHƏDƏ AZƏRBAYCAN-HOLLANDİYA ƏMƏKDAŞLIĞI GENİŞLƏNİR
AZƏRTAC xəbər verir ki, Azərbaycanın Baş naziri Artur Rasizadə aprelin 15-də Niderland Krallığı Sosial Sığorta Bankının baş icraçı direktoru, bankın İdarə Heyətinin sədri Errol Frank Stuve ilə görüşmüşdür.
Hökumət başçısı qeyd etmişdir ki, Azərbaycan dövlət müstəqilliyi əldə etdikdən sonra ölkənin sosial sahəsində yeni sistem yaradılması ilə əlaqədar işlər başlanmışdır və bu sistemin təkmilləşdirilməsi üçün həmin sahədə yaxşı ənənələri olan Hollandiyanın təcrübəsi çox faydalı ola bilər.
Cənab Stuve ümumavropa pensiya fondları və sosial fondlar şəbəkəsi yaradılması sahəsində azərbaycanlı həmkarları ilə əməkdaşlığı yüksək qiymətləndirərək qeyd etmişdir ki, Hollandiya neft gəlirlərindən sosial sahənin ehtiyacları üçün istifadə edilməsinə dair Azərbaycanda tətbiq olunan metodikanı öyrənmək niyyətindədir.
Görüş zamanı Ermənistan-Azərbaycan, Dağlıq Qarabağ münaqişəsi mövzusuna da toxunulmuş, əhalinin sosial baxımdan zəif müdafiə olunan təbəqələrinə, o cümlədən qaçqınlara və məcburi köçkünlərə yardım göstərilməsi məsələləri ilə bağlı fikir mübadiləsi aparılmışdır.
Bölmənin digər xəbərləri
