Bakı, 2 iyun, AZƏRTAC

Əsası ulu öndər Heydər Əliyev tərəfindən qoyulan və Prezident İlham Əliyev tərəfindən uğurla həyata keçirilən Azərbaycanın inkişaf strategiyası dövlətimizin gücünün artmasında, vətəndaşların həyat səviyyəsinin yaxşılaşmasında mühüm rol oynayır. 2000-ci illərdə Azərbaycan BMT-nin qəbul etdiyi “Minilliyin İnkişaf Məqsədləri” çərçivəsində Azərbaycan Respublikasında yoxsulluğun azaldılması və davamlı inkişaf Dövlət Proqramlarını icra edirdi. İndi isə ölkəmiz BMT-nin qəbul etdiyi Dayanıqlı İnkişaf Məqsədləri üzrə müxtəlif fəaliyyətlər həyata keçirir. Bu proqramlar inkişafımızın hansı səviyyədən - hansı səviyyəyə gəlməsinə əyani sübutdur.

Bu fikirlər “İnformasiya Təşəbbüslərinə Dəstək” ictimai birliyinin sədri Cəsarət Hüseynzadənin “Sosial xidmətlərdə innovativ təşəbbüslər” adlı məqaləsində qeyd edilib.

AZƏRTAC məqaləni təqdim edir.

Azərbaycan Müzəffər Ali Baş Komandan İlham Əliyevin rəhbərliyi ilə 44 günlük Vətən Müharibəsində qələbə qazanaraq regionda yeni reallıqlar yarandıqdan sonra sosial - iqtisadı inkişaf ilə bağlı yeni təşəbbüslərlə çıxış edir. Azərbaycan Respublikası Prezidentinin 2021-ci il 2 fevral tarixli Sərəncamı ilə “Azərbaycan 2030: sosial-iqtisadi inkişafa dair Milli Prioritetlər” təsdiq edildi. Qəbul edilən beş Milli Prioritetdən biri də “Dinamik, inklüziv və sosial ədalətə əsaslanan cəmiyyət”dir. Bu sahədə Prezident İlham Əliyev və Birinci vitse-prezident Mehriban Əliyevanın təşəbbüsü və tapşırıqları ilə müxtəlif sosial layihələr və proqramlar həyata keçirilməkdədir.

Əmək və Əhalinin Sosial Müdafiəsi Nazirliyi tərəfindən şəffaflığın və əlçatanlığın təmin edilməsi məqsədi ilə bu layihə və proqramların icrasında innovativ yanaşma əsas götürülür.

Aparılan islahatlar çərçivəsində sosial xidmətlər sahəsində elektron infrastrukturun formalaşması sürətlə davam edir və bu sahədə müasir və çevik idarəçilik-monitorinq sistemi formalaşır. Məhz son illər sosial xidmətlərin innovativ yanaşmalara əsaslanan modern, çevik və optimal mexanizmlər üzərində qurulması diqqətçəkən amillərdəndir.

Həyata keçirilən innovativ islahatlar, həmçinin sosial xidmətlərin ədalətli bölgüsünə və əlçatanlığına şərait yaradır. Həyata keçirilən islahatlar və davamlı inkişaf tədbirləri nəticəsində Əmək və Əhalinin Sosial Müdafiəsi Nazirliyi və nazirliyin tabeliyində olan qurumlar nüfuzlu beynəlxalq təşkilatlar tərəfindən mükafatlara və sertifikatlara layiq görülüb. Nazirliyin tabeliyində olan Sosial Xidmətlər Agentliyi də xidmətləri elektron formata keçirib. Sevindirici haldır ki, Sosial Xidmətlər Agentliyi, həmçinin sosial reabilitasiya məqsədi ilə müxtəlif innovativ layihələrin həyata keçirilməsini hədəfləmişdir. Xüsusi ilə qeyd etmək lazımdır ki, bu tip innovativ layihələr əvvəllər beynəlxalq təşkilatların dəstəyi ilə reallaşırdısa, hazırda bu cür effektiv layihələr ilə Azərbaycanın dövlət qurumları çıxış edir və bu fəaliyyətlərə yerli vətəndaş cəmiyyəti təşkilatları da cəlb edilir.

Pandemiya dövründə Sosial Xidmətlər Agentliyinin dəstəyi ilə yaradılan www.surdotv.az video portalı eşitmə və nitq qabiliyyəti olmayan sağlamlıq imkanları məhdud şəxslərin informasiya əldə etmək hüquqlarının təmin olunması üçün mühüm platforma oldu. Platformada qısa zaman kəsiyində 200-dən artıq bədii və cizgi filmini surdo tərcümə edilərək eşitmə və nitq qabiliyyəti olmayan sağlamlıq imkanları məhdud uşaqlara təqdim olunub.

Sosial Xidmətlər Agentliyi 1 İyun - Uşaqların Beynəlxalq Müdafiəsi Günündə yeni bir platformanı təqdim etməklə ilə bu ənənəni davam etdirib. Belə ki, Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin sifarişi ilə icra olunan layihə çərçivəsində autizmli uşaqlar üçün “AutizmDERS” mobil tətbiqi və www.autizmders.az saytı yaradılıb. “AutizmDERS” mobil tətbiqini həm iOS (Apple Store), həm də Android (Google Play) əməliyyat sistemli smartfonlarda istifadə etmək mümkündür. Yeni layihənin həm sağlamlıq imkanları məhdud uşaqlar, həm də onların valideynləri üçün əhəmiyyəti barədə məlumat verərək bu platformanın sağlamlıq imkanları məhdud uşaqların sosial reabilitasiyası ilə bağlı valideynlərinin bacarıqlarının artırılmasına töhfə verəcək.