Sudanda qaçqın düşərgəsinə hücum nəticəsində azı 30 nəfər ölüb
Qahirə, 11 oktyabr, AZƏRTAC
Sudanda mərkəzi hakimiyyətə qarşı silahlı mübarizə aparan Çevik Dəstək Qüvvələri tərəfindən bu gün Şimali Darfur vilayətinin mərkəzi əl-Faşir şəhərindəki qaçqın düşərgəsinə PUA hücumu nəticəsində azı 30 nəfər həyatını itirib.
AZƏRTAC yerli mediaya istinadla xəbər verir ki, şəhərin ətrafında Sudan ordusu ilə üsyançılar arasında şiddətli döyüşlər gedir. Altıncı Piyada Briqadası Çevik Dəstək Qüvvələrinin şəhərin cənub istiqamətindən daxil olmasının qarşısını alıb. Üsyançıların bir neçə döyüş maşını məhv edilib.
BMT-nin insan hüquqları üzrə ali komissarı Volker Turk cümə axşamı bildirib ki, Qərbi Sudanda qaçqın düşərgəsi və ətrafında baş verən döyüşlər nəticəsində azı 53 mülki şəxs ölüb, 60-dan çox insan yaralanıb və ölü sayının artacağı ehtimal edilir.
2023-cü il aprelin 15-dən etibarən Çevik Dəstək Qüvvələri Sudan ordusu ilə ölkəyə nəzarət uğrunda mübarizə aparır, nəticədə 40 mindən çox insan həyatını itirib, 14 milyondan çox insan evlərini tərk etməyə məcbur olub.
Əl-Faşir şəhəri bir ildən çoxdur ki, mühasirəyə alınıb. BMT və digər humanitar təşkilatlar xəbərdarlıq edir ki, hələ də 260 min mülki şəxs şəhərdə qalıb. Yüz minlərlə insan isə yaxınlıqdakı Tuğla şəhərinə qaçıb.
Şıxəli Əliyev
AZƏRTAC-ın xüsusi müxbiri
Qahirə
Bölmənin digər xəbərləri
