SUMQAYIT POLİSİ SİLAH VƏ DÖYÜŞ SURSATI AŞKAR ETMİŞDİR
AZƏRTAC xəbər verir ki, Sumqayıt hüquq mühafizə orqanlarının əməkdaşları Hacı Zeynalabdin Tağıyev qəsəbəsinin ərazisində silah və döyüş sursatının iri partiyasını aşkar etmişlər.
Bunu AZƏRTAC-ın müxbirinə şəhərin polis idarəsinin rəisi, polkovnik Mehdi Hümbətov bildirmişdir.
Şəhərin ikinci polis bölməsinin növbətçi hissəsinə anonim telefon zəngi daxil olmuş və beton zavodu ərazisində silah olduğu bildirilmişdir. Bir qrup polis əməkdaşı həmin yerə yollanmışdır. Axtarış zamanı bir “TT” markalı tapança, iki qumbaraatan gülləsi, 9 döyüş qumbarası, 4 mərmi, 572 müxtəlif çaplı patron və 3 patron sandığı, “Fi-1” qumbaraları üçün 5 fitil, 7,62 mm çaplı 113 ədəd patron və digər sursat tapılmışdır.
Şəhərin qəsəbələrində narkotiklərlə və qeyri-qanuni silah saxlanması ilə mübarizə gücləndirilmişdir. Məlumdur ki, aprelin 14-də Hacı Zeynalabdin Tağıyev qəsəbəsində bir neçə yaşayış evində operativ-axtarış tədbirləri zamanı narkotiklər və ov silahları aşkar olunmuşdur. Bu cür faktların aşkara çıxarılması tədbirləri davam edir.
Şəhərin ikinci polis bölməsi faktlarla bağlı təhqiqat aparır.
Bölmənin digər xəbərləri
