Bakı, 1 fevral (AZƏRTAC). Suraxanı rayon Heydər Əliyev Mərkəzində gənclərlə görüş keçirilmişdir.

AZƏRTAC xəbər verir ki, tədbir 2 fevral - Gənclər Gününə həsr olunmuşdur.

Görüş iştirakçıları əvvəlcə Heydər Əliyev parkında ulu öndərin abidəsi önünə gül dəstələri düzmüşlər. Sonra Heydər Əliyev Mərkəzi ilə tanışlıq olmuşdur. Gənclər mərkəzdə ümummilli liderin həyatının və çoxşaxəli dövlətçilik fəaliyyətinin müxtəlif dövrlərini əks etdirən materiallar, fotoşəkillər və eksponatları maraqla seyr etmişlər.

Suraxanı rayon gənclər və idman idarəsinin rəisi Amil Bağırov rayon gənclərinin ötən il əldə etdikləri uğurlar haqqında məlumat vermişdir.

Canlı diskussiya formasında təşkil olunmuş görüşdə çıxış edən Rayon İcra Hakimiyyətinin başçısı İlqar Abbasov gəncləri 2 fevral -Gənclər günü münasibətilə təbrik etmişdir. Bildirilmişdir ki, ümummilli liderimiz Heydər Əliyev öz siyasətində daima gənclərə qayğı göstərmiş, onların bir fərd kimi yetişməsinə xüsusi önəm vermişdir. Ulu öndər respublika rəhbərliyinə gəldiyi ilk dövrlərdən gənclərin himayədarı kimi çıxış edərək sağlam düşüncəli yeni nəslin yetişdirilməsi sahəsində misilsiz işlər görmüşdür. Bu gün Prezident İlham Əliyevin rəhbərliyi altında ölkəmizdə məqsədyönlü şəkildə həyata keçirilən işlərin nəticəsi olaraq müasir Azərbaycan gəncliyi yeni inkişaf mərhələsinə qədəm qoymuşdur. Ölkəmizdə uğurla həyata keçirilən dövlət gənclər siyasəti gələcək nəslin intellektual səviyyəsinin artmasına olduqca müsbət təsir göstərir. Gənc nəslin düzgün yetişdirilməsi ölkə siyasətində önəmli yer tutur. Dövlət gənclər siyasətinin Prezident İlham Əliyev tərəfindən uğurla davam etdirilməsinin nəticəsidir ki, bu gün Azərbaycan gəncləri bütün sahələrdə özlərini doğruldurlar.

Bakı Şəhər Gənclər və İdman İdarəsinin rəisi Raqif Abbasov qeyd etmişdir ki, ölkəmizdə gənclərlə iş sahəsində görülən tədbirlər Azərbaycan gəncliyinin inkişafına təkan vermiş, onların cəmiyyətdə özlərini təsdiq etməsində böyük rol oynamışdır.

Tədbirdə xüsusi vurğulanmışdır ki, bu yüksək münasibətə cavab olaraq Azərbaycan gəncləri bütöv və müstəqil Azərbaycan naminə bütün güclərini toplamalı, vətənin inkişafı üçün səylə çalışmalı, öz siyasətində onlara arxalanan Prezident İlham Əliyevin etimadını həmişə doğrultmalıdırlar.

Görüşün sonunda rayonun ictimai həyatında fəal iştirak etmiş bir qrup gəncə Rayon İcra Hakimiyyəti başçısının Fəxri fərmanı təqdim olunmuşdur.