Bakı, 10 dekabr (AZƏRTAC). Dekabrın 10-da Suraxanı rayonundakı Heydər Əliyev Mərkəzində Azərbaycan Dövlət Pedaqoji Universiteti (ADPU) və Suraxanı Rayon İcra Hakimiyyətinin (RİH) birgə təşkilatçılığı ilə ümummilli lider Heydər Əliyevin xatirəsinə həsr olunmuş “Heydər Əliyev ideyaları ilə zirvələrə doğru” mövzusunda elmi-praktik konfrans keçirilmişdir.

Konfrans iştirakçıları əvvəlcə Heydər Əliyev Parkında ulu öndərin abidəsi önünə tər güllər düzmüş, Heydər Əliyev Mərkəzi ilə tanış olmuşlar. Tədbir iştirakçıları burada “Millət Atası” filminə baxmışlar.

RİH başçısı İlqar Abbasov konfransda çıxış edərək ümummilli lider Heydər Əliyevin keçdiyi şərəfli ömür yoluna nəzər salmışdır.

Bildirilmişdir ki, Heydər Əliyev şəxsiyyəti Vətənini, millətini sevən hər bir azərbaycanlı üçün tükənməz qürur mənbəyidir və bu gün nəinki Azərbaycanda, xarici ölkələrdə də ulu öndərin anım günü ilə bağlı silsilə tədbirlər keçirilir.

Bu böyük şəxsiyyətin dövlətçilik təcrübəsinə həsr edilən çoxlu tədqiqatlar aparılmasına, kitablar yazılmasına baxmayaraq, onun zəngin təcrübəsi və səmərəli fəaliyyətinin təhlilinə ehtiyac duyulan hələ açılmamış səhifələr var və bunlar öz tədqiqatçılarını gözləyir.

Bu gün müasir Azərbaycan özünəməxsus inkişaf yolu ilə gedir. Heydər Əliyev məktəbinin yetirməsi, onun siyasi kursunun layiqli davamçısı Prezident İlham Əliyevin həyata keçirdiyi tədbirlər, imzaladığı fərman və sərəncamlar, xalqla birbaşa ünsiyyətdə olması ümummilli liderin başlatdığı yolun davamıdır. Hər bir Azərbaycan vətəndaşının borcu isə Heydər Əliyevin şah əsəri olan Azərbaycanı qoruyub saxlamaqdır.

İ.Abbasov bildirmişdir ki, Heydər Əliyev Fondu ümummilli liderimizin ideyalarına sadiq qalaraq bu gün ardıcıl və məqsədyönlü fəaliyyətini uğurla davam etdirir. Heydər Əliyev Fondu UNESCO-nun və İSESCO-nun xoşməramlı səfiri, Milli Məclisin deputatı Mehriban xanım Əliyevanın rəhbərliyi ilə Azərbaycanımızın adını ucaldır.

ADPU-nun rektoru, AMEA-nın müxbir üzvü, professor Yusif Məmmədov demişdir ki, Azərbaycanın yeni tarixinin bütöv bir mərhələsi dünya səviyyəli siyasi və dövlət xadimi, zəmanəmizin bənzərsiz şəxsiyyəti Heydər Əliyevin adı ilə bağlıdır. Ümummilli liderimizin adı özünü azərbaycanlı sayan hər bir kəsin qəlbində sadəliyi, səmimiyyəti, alicənablığı, vətənpərvərliyi və bütün digər yüksək keyfiyyətləri ilə unudulmaz izlər buraxmışdır. Heydər Əliyevin respublikaya rəhbərliyi dövrü Azərbaycanda təhsil, elm və mədəniyyətin intibah illəri olmuşdur. Heydər Əliyev milli təhsilimizin bütün sahələr üzrə inkişafına yüksək diqqət və qayğısı göstərmişdir. AMEA-da məhz bu illər dünya elminin aparıcı istiqamətlərində tədqiqatlar aparılmış, mühüm elmi nəticələr əldə edilmişdir.

Ulu öndərin 1997-ci ildə AMEA-nın üzvləri ilə tarixi görüşü, proqram səciyyəli nitqi hələ uzun illər alimlərimizin yaradıcılıq istiqamətlərini müəyyənləşdirməkdə meyar olacaqdır.

Konfransda “Heydər Əliyev: Dövlət xalq üçündür”, “Dahi öndərin neft strategiyasının uğurları və perspektivləri”, “Heydər Əliyev və Azərbaycan təhsili”, “Heydər Əliyev Azərbaycanın xilaskarıdır” mövzularında məruzələr dinlənilmişdir.

Tədbirdə Azərbaycan Respublikası Prezidenti Administrasiyasının məsul işçisi Tağı Tağıyev, Milli Məclisin deputatları Ağacan Abiyev, Sevinc Fətəliyeva iştirak etmişlər.

Sonda ADPU-nun tələbələri ədəbi-bədii kompozisiya ilə çıxış etmişlər.