TƏHSİL NAZİRİ TÜRKİYƏNİN AZƏRBAYCANDAKI SƏFİRİ İLƏ GÖRÜŞMÜŞDÜR
Təhsil naziri Misir Mərdanov Türkiyənin Azərbaycana yeni təyin olunmuş səfiri Hulusi Kılıç ilə görüşmüşdür.
Təhsil Nazirliyindən AZƏRTAC-a bildirmişlər ki, görüşdə nazir Misir Mərdanov Azərbaycan ilə Türkiyənin mehriban qardaşlıq münasibətlərindən danışmışdır.
Ölkəmizdə fəaliyyət göstərən türk liseylərində diqqətəlayiq nailiyyətlər qazanıldığını qeyd edən nazir, eyni zamanda, qardaş ölkələrimizin təhsil proqramlarının yaxınlaşması, ortaq dərsliklərin nəşr edilməsi istiqamətində addımlar atılmasının, birgə müvafiq layihələr həyata keçirilməsinin vacibliyini bildirmişdir.
Hulusi Kılıç xalqlarımızın tarixi birliyindən bəhs etmişdir. Ölkələrimiz arasındakı əlaqələrin, o cümlədən təhsil sahəsi üzrə əməkdaşlığın əhəmiyyətini qeyd edən səfir bu sahədə aparılan işlərə kömək göstərməyə hazır olduğunu söyləmişdir.
Sonra təhsil əlaqələrimizin inkişafı ilə bağlı geniş müzakirələr aparılmışdır.
Bölmənin digər xəbərləri
