İQTİSADİYYAT
Tərtər rayonunun kəndləri abadlaşır
Tərtər, 1 fevral (AZƏRTAC). Tərtər Rayon İcra Hakimiyyəti başçısının Cəmilli kənd inzibati ərazi dairəsi üzrə nümayəndəliyində 2013-cü ildə görülən işlər və qarşıda duran vəzifələrə həsr olunmuş yığıncaq keçirilmişdir.
AZƏRTAC xəbər verir ki, yığıncaqda Cəmilli kənd inzibati ərazi dairəsi üzrə görülmüş işlərdən danışılmış, qarşıda duran məsələlərin həlli yolları müzakirə olunmuşdur.
Məlumat verilmişdir ki, Tərtər rayonunun Cəmilli kənd inzibati ərazi dairəsi üzrə nümayəndəliyi Cəmilli və Bala Kəngərli kəndlərini əhatə edir. Nümayəndəliyin ümumi ərazisi 925 hektar, əhalisi 2150 nəfərdir. 2013-cü ildə Tərtər şəhəri ilə yanaşı rayonun kəndlərində, o cümlədən Cəmilli kənd inzibati ərazi dairəsində də abadlıq işləri aparılmış, infrastrukturun yaxşılaşdırılması, yolların, su arxlarının bərpası və təmiri istiqamətində xeyli iş görülmüşdür. Bala Kəngərli kəndində ümumi orta məktəb üçün yeni bina istifadəyə verilmiş, Prezident İlham Əliyevin müvafiq sərəncamı ilə Cəmilli-Dəmirçilər avtomobil yolunun tikintisinə, həmçinin kəndlərin qazlaşdırılmasına başlanılmışdır. Əhalinin suvarma suyuna olan tələbatının ödənilməsi məqsədilə Bala Kəngərli kəndində 2, Cəmilli kəndində 1 subartezian quyusu qazılmışdır.
Yığıncaqda bildirilmişdir ki, ötən il 9540 ton buğda, 497 ton arpa, 2930 ton kartof, 5100 ton tərəvəz istehsal edilmişdir. İl ərzində iribuynuzlu mal-qaranın sayı 875 başa, xırda buynuzlu heyvanların sayı 3521-ə çatmışdır.
Yığıncaqda uğurlarla yanaşı problemlərdən və qarşıda duran vəzifələrdən də danışılmışdır. Qeyd olunmuşdur ki, içməli və suvarma suyuna tələbatın ödənilməsi üçün yeni 3 ədəd subartezian quyusunun qazılmasına, kənd klubunun və uşaq bağçasının tikintisinə, Cəmilli kənd tam orta məktəbinin təmirinə ehtiyac vardır. Bu problemlərin 2014-cü ildə həll olunması nəzərdə tutulmuşdur.