TİBB İŞÇİLƏRİNİN PEŞƏ BAYRAMI QEYD OLUNMUŞDUR
AZƏRTAC xəbər verir ki, 17 İyun - Tibb işçiləri günü münasibətilə Göyçayda bayram tədbiri keçirilmişdir.
Mərasimdə Göyçay Rayon İcra Hakimiyyətinin başçısı Mənsur Məmmədov, mərkəzi rayon xəstəxanasının baş həkimi Famil Zeynalov, təhsil şöbəsinin müdiri Asif Nəbiyev çıxış edərək, ulu öndər Heydər Əliyevin Azərbaycanda səhiyyə sisteminin inkişafındakı xidmətlərindən, 2001-ci il iyunun 4-də tibb işçilərinin peşə bayramının təsis edilməsi ilə bağlı onun imzaladığı Sərəncamın mahiyyətindən, həkimlərin sosial-məişət şəraitinin yaxşılaşdırılması, əmək haqlarının artırılması istiqamətində gördüyü işlərdən danışmışlar.
Qeyd etmişlər ki, dahi şəxsiyyət Heydər Əliyevin siyasi kursunu inamla davam etdirən Prezident İlham Əliyevin səhiyyə sahəsində həyata keçirdiyi uğurlu islahatlar bu sahənin inkişafında əsaslı dönüş yaratmışdır. Bu gün ölkəmizdə həkimlik peşəsinə yüksək qiymət verildiyini, tibb işçilərinə dövlət tərəfindən diqqət və qayğı göstərildiyini qeyd edən natiqlər son illər Azərbaycanda səhiyyə sisteminin maddi-texniki bazasının gücləndirilməsi, tibb ocaqlarının əsaslı təmir edilməsi, müasir müalicə-diaqnostika mərkəzlərinin tikilməsi, kadr çatışmazlığı probleminin aradan qaldırılması istiqamətində görülən əməli tədbirləri yüksək qiymətləndirmişlər.
Tədbirdə qeyd olunmuşdur ki, son bir ildə Göyçay Mərkəzi Rayon Xəstəxanasının travmatologiya şöbəsi, cərrahiyyə bloku, poliklinika şöbəsinin 10 otağı əsaslı təmir olunmuş, burun-boğaz-qulaq əməliyyatlarının aparılması üçün cərrahiyyə otağı yaradılmış, tibb ocağının həyətində artezian quyusu qazılmışdır. Həmçinin Göyçay şəhərində Ailə Planlaşdırılması Mərkəzi yaradılmış, Şəhadət kəndində feldşer-mama məntəqəsi üçün yeni bina tikilmişdir. Qaraməryəm, İncə, Ləkçiplaq, Bığır, Məlikkənd və Çərəkə kənd ambulatoriyalarının, Qızılağac kənd xəstəxanasının və şəhər poliklinikasının nəzdində sağlamlıq mərkəzləri yaradılmışdır.
Mərasimdə səhiyyə işçilərinə bayram təbrikləri ünvanlanmış, işində fərqlənən bir qrup həkimə rayon icra hakimiyyətinin fəxri fərmanları və hədiyyələri təqdim olunmuşdur.
Tədbir bayram konserti ilə davam etdirilmişdir.
Bölmənin digər xəbərləri
