Tokio Olimpiadasının təxirə salınması üçün tələb olunan məbləğ açıqlanıb
Bakı, 4 dekabr, AZƏRTAC
“Tokio-2020” Təşkilat Komitəsi və Yaponiya hökuməti Olimpiadanın 2020-ci ildən 2021-ə təxirə salınması üçün tələb olunan məbləğlə bağlı razılığa gəliblər.
AZƏRTAC “Kyodo” agentliyinə istinadla məlumat verir ki, bu məbləğ 294 milyard yen (təqribən 2,8 milyard dollar) təşkil edir. Ümumi məbləğin 96 milyard yeninin (təqribən 923 milyon dollar) yarışlarda koronavirusa yoluxma hallarının qarşısını almaq üçün tədbirlərə yönəldiləcəyi qeyd olunur. Yüz iyirmi milyard yen (təxminən 1,1 milyard dollar) Yaponiya paytaxtının rəhbərliyi tərəfindən qarşılanacaq. Qalan məbləğ “Tokio-2020” Təşkilat Komitəsi (103 milyard yen (təxminən 990 milyon dollar) və Yaponiya hökuməti (71 milyard yen (təxminən 682 milyon dollar) tərəfindən ödəniləcək.
Xatırladaq ki, Tokio Olimpiadası iyulun 24-dən avqustun 5-dək keçirilməli idi. Koronavirus pandemiyası səbəbindən yarış bir il sonraya təxirə salınıb və iyulun 23-dən avqustun 8-dək keçirilməsi planlaşdırılır.
Bölmənin digər xəbərləri
