Bakı, 3 mart (AZƏRTAC). Tələbə Qəbulu üzrə Dövlət Komissiyası (TQDK) martın 4-də Daxili İşlər Orqanlarında vakant vəzifələrə qəbul olunmaq istəyən namizədlər üçün test imtahanı keçirəcəkdir.

TQDK-dan AZƏRTAC-a bildirmişlər ki, sənəd qəbulu haqqında elan, “Müsabiqənin keçirilməsi Qaydaları”, test imtahanının proqramı və fiziki hazırlıq səviyyəsinin minimal normativləri “Mübariz Keşikdə” qəzetində, həmçinin digər kütləvi informasiya vasitələrində, ölkənin bir sıra şəhər və rayonlarının mətbu orqanlarında dərc olunmuş, DİN-in rəsmi internet saytında yerləşdirilmişdir.

Sənədlərin qəbulu Azərbaycan Respublikası Daxili İşlər Nazirliyi tərəfindən aparılmışdır.

Müsabiqədə iştirak etmək üçün qeydə alınmış 120 nəfərin namizəddən 66 nəfəri hüquq istiqaməti üzrə, 54-ü isə pedaqogika istiqaməti üzrə sənəd vermişdir.

Namizədlərə test imtahanında iştirak etmək üçün “İmtahana buraxılış vəsiqəsi” və “Yaddaş kitabçası” fevralın 28-dən etibarən təqdim olunmuşdur.

İşə qəbul hüquq və pedaqogika istiqamətləri üzrə aparılır.

İmtahanda namizədlərə 100 sualdan ibarət test kitabçası təqdim olunacaqdır. Hüquq istiqaməti üzrə 80 sual qanunvericilik, 20 sual məntiqi nəticə çıxarma qabiliyyətini müəyyən edən sahə üzrə olacaqdır.

Pedaqogika istiqaməti üzrə imtahanda isə 30 sual qanunvericilik, 30 sual pedaqogika, 20 sual yaş psixologiyası, 20 sual isə məntiqi nəticə çıxarma qabiliyyətini müəyyən edən sahə üzrə olacaqdır.

Sualları cavablandırmaq üçün namizədlərə 3 saat vaxt veriləcəkdir. Hər düzgün cavab 1 balla qiymətləndirilir.

Test imtahanında 65 və daha çox bal toplayan namizədlər müsabiqənin yekun mərhələsinə - müsahibəyə buraxılacaqdır.