TÜRKİYƏ DÖVLƏTİ AZƏRBAYCAN VƏ ERMƏNİSTAN PREZİDENTLƏRİNİN GÖRÜŞÜNDƏN MƏMNUNDUR
Türkiyə dövləti Azərbaycan və Ermənistan prezidentləri Heydər Əliyev və Robert Koçaryanın Dağlıq Qarabağ probleminin həlli üçün keçirdikləri görüşdən məmnundur və Ermənistandan işğal etdiyi Azərbaycan torpaqlarından dərhal çəkilməsini gözləyir. Bu barədə türkiyənin “Cümhuriyyət” qəzetində məlumat verilmişdir.
Qəzet daha sonra yazır: Türkiyə XİN-in əməkdaşı Yusif Buluç həftəlik mətbuat konfransında bildirmişdir ki, Türkiyə Əliyev-Koçaryan görüşünü münaqişənin həlli çərçivəsində müsbət bir hadisə kimi qiymətləndirir. İki ölkə arasındakı problemlərin artıq hamıya məlum olduğunu, Azərbaycanın ərazi bütövlüyünün pozulmasının işğal xarakteri daşıdığını vurğulayan diplomat demişdir: “Bu işğalın ortadan qaldırılması və Azərbaycanın ərazi bütövlüynün bərpa olunması bizim siyasətimizin də başlıca məqsədidir. Ümid edirik ki, görüş məhz bu siyasətin doğrulması üçün yeni bir addım olmuşdur”.
Türkiyənin dövlət və özəl televiziya kanalları, ölkənin çox nüfuzlu “Hürriyyət”, “Zaman”, “Ortadoğu”, “Radikal” qəzetləri Azərbaycan Prezidenti Heydər Əliyevin Ermənistan-Azərbaycan, Dağlıq Qarabağ münaqişəsinin həll olunması sahəsindəki ardıcıl siyasi xəttini yüksək qiymətləndirmişlər.
Qardaş ölkənin kütləvi informasiya vasitələri Ermənistanın işğalçı siyasətinə və barışmaz mövqeyinə baxmayaraq, çox dərin sosial-iqtisadi böhran şəraitində yaşadığını xüsusi vurğulamışlar.
Bölmənin digər xəbərləri
