Türkiyədə siqaretçəkmə qadağası sərtləşdirilə bilər
Ankara, 10 fevral, AZƏRTAC
Türkiyə Səhiyyə Nazirliyi ictimai yerlərdə siqaret çəkməyə qoyulan qadağanı sərtləşdirmək üçün yeni təşəbbüslər hazırlayır.
AZƏRTAC xəbər verir ki, mediada yer alan məlumatlara görə, qadağanın Fransa modelini tətbiq etmək planlaşdırılır. Bu model uşaqlar və yeniyetmələrin olduğu yerlərdə, xüsusən də təhsil müəssisələrinin, parkların, avtobus dayanacaqlarının yaxınlığında və yaşayış binalarının girişlərində siqaret çəkənlər üçün xüsusilə yüksək cərimələrin tətbiqini nəzərdə tutur.
“Türkiye” qəzetinin məlumatına görə, “ictimai yerlər” termini üçün tənzimləyici çərçivə, eləcə də siqaretçəkmə yerləri üçün məsafə tələbləri yenidən nəzərdən keçirilir ki, bu da passiv tütün tüstüsünün inhalyasiyası riskini azaldacaq.
Qeyd etmək lazımdır ki, Türkiyədə qapalı məkanlarda tütün çəkməyə və ya nikotin tərkibli məhsulların istehlakına uzun müddətdir qadağa qoyulub. Yeni qanuni tələblər tətbiq olunarsa, ürək-damar və tənəffüs yolları xəstəlikləri, xərçəng, insult və diabet də daxil olmaqla passiv siqaretçəkmə nəticəsində ölüm hallarının azalması gözlənilir. Mütəxəssislər bildirirlər ki, Türkiyədə hər gün orta hesabla 300 nəfər tütünlə əlaqəli xəstəliklərdən dünyasını dəyişir.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
