Olimpiadalarda uğur qazanan gənc riyaziyyatçı: Elə gün olurdu ki, 10 saat hazırlaşırdım
Bakı, 12 sentyabr, AZƏRTAC
Azərbaycanlı riyaziyyatçı Fərhad Hüseynov beynəlxalq və respublika fənn olimpiadalarında qazandığı uğurlardan, hazırlıq prosesindən və gələcək hədəflərindən danışıb.
O, AZƏRTAC-a açıqlamasında bildirib ki, 7-ci sinifdə fizika, riyaziyyat və informatika təmayüllü Respublika Liseyinə qəbul olub və həmin vaxtdan olimpiadalara hazırlaşmağa başlayıb.
İlk vaxtlarda olimpiadalara hazırlıq prosesində qardaşının ona böyük dəstək verdiyini deyib: “Əvvəlcə evdə oxumağa başladım və bu işdə qardaşım mənə kömək edirdi. O da olimpiadaçı idi”.
Fərhad Hüseynov qeyd edib ki, sonra Təhsil Nazirliyinin keçirdiyi seçimlər nəticəsində xüsusi hazırlıq dərslərinə cəlb olunub və olimpiadalara intensiv şəkildə hazırlaşmağa başlayıb. Onun sözlərinə görə, qardaşı ilə mütəmadi olaraq onlayn görüşləri də hazırlıq prosesində mühüm rol oynayıb.
“Bir gün 6 saat dərs oxuyurdum, elə gün olurdu ki, 10 saat hazırlaşırdım. Əgər evdə oxumasaydım, digərləri daha çox oxuyub məni keçə bilərdilər. Ona görə bu, mənə motivasiya idi ki, nə qədər çox oxusam, o qədər yaxşı olar”, - deyən F.Hüseynov əlavə edib ki, 8-ci sinifdə Respublika Fənn Olimpiadasında bürünc medal qazanıb. Daha sonra JBMO beynəlxalq riyaziyyat olimpiadasında və Əl-Xarəzmi beynəlxalq riyaziyyat olimpiadasında iştirak hüququ əldə edib və hər iki yarışdan bürünc medalla qayıdıb.
Doqquzuncu sinifdə həmin olimpiadalarda yenidən iştirak hüququ qazanan Fərhad Respublika Fənn Olimpiadası ilə yanaşı, JBMO və Əl-Xarəzmi beynəlxalq riyaziyyat olimpiadalarının hər birində gümüş medal əldə edib.
Onuncu sinifdə hazırlığını daha da gücləndirən gənc IMO riyaziyyat olimpiadasına qatılmaq hüququ qazanıb, Respublika Fənn Olimpiadasında qızıl medala layiq görülüb və Jautikov riyaziyyat olimpiadasında Azərbaycanı təmsil edib.
On birinci sinifdə isə Respublika Fənn Olimpiadasında yenidən qızıl medal qazanan Fərhad Hüseynov Jautikov olimpiadasında ikinci dəfə iştirak hüququ əldə edib.
Gənc riyaziyyatçı hesab edir ki, əldə etdiyi nəticələrdə davamlı hazırlıq və ailəsinin dəstəyi mühüm rol oynayıb.
Müxbir-Tünzalə Arazlı
Bölmənin digər xəbərləri
