Bakı, 8 iyul, AZƏRTAC

Hər bir fəaliyyət sahəsində uğurlu başlanğıc, qarşıya qoyulan hədəfə çatmaq istiqamətində atılan hər bir inamlı addım növbəti nailiyyətlərə yol açan başlıca amildir. Bu amili “İki sahil” qəzetinin 31 illik ömür yoluna da şamil edə bilərik. Bu gün qəzet ömrünün gənclik illərinin ən mükəmməl dövrünü yaşayır. Ötən dövrdə “İki sahil” daha da təkmilləşdi, dövrün, zamanın yeni tələblərini özündə, fəaliyyətində əks etdirməyə çalışdı, yarandığı gündən tutduğu yola, əqidəsinə sadiqlik nümayiş etdirən bir mətbu orqan olaraq çağdaş Azərbaycanın media məkanında yerini və mövqeyini möhkəmləndirdi.

AZƏRTAC xəbər verir ki, bu fikirləri “İki sahil” qəzetinin baş redaktoru, Əməkdar jurnalist Vüqar Rəhimzadənin müsahibəsi nəşrin 31 illiyi ilə bağlı açıqlamasında bildirib.

V.Rəhimzadə qeyd edib ki, hər bir jurnalistin işğal altındakı torpaqlarımızın azad edilməsi xəbərini geniş oxucu auditoriyasına çatdırmaq kimi ümdə arzusu Prezident, Müzəffər Ali Baş Komandan İlham Əliyevin qətiyyəti, rəşadətli Ordumuzun gücü, qüdrəti, xalqımızın dəmir yumruq kimi birliyi, torpaq, Vətən sevgisi sayəsində reallığa çevrilib.

Bu gün qəzetin səhifələrində azad Qarabağda, azad Şərqi Zəngəzurda həyata keçirilən nəhəng infrastruktur layihələri, görülən quruculuq işləri, Azərbaycanın uğurlarının zirvəsində dayanan tarixi Zəfərimizin yaratdığı reallıqlar əsasında görülən işlər, atılan tərəqqi ruhlu addımların nəticələri ilə bağlı geniş materiallar öz əksini tapır. Biz hədəflərimizə doğru addım-addım irəliləyirik. Artıq bu gün biz torpaqlarımızın işğaldan azad edilməsi müjdəçisi olmaqdan Böyük Qayıdış sevincini çatdırmağa doğru irəliləyirik.

Baş redaktor vurğulayıb ki, “İki sahil” dövlət müstəqilliyini bərpa edən Azərbaycanın uğurlarının bələdçisidir. Bu mühüm məqam qəzetin yarandığı dövrün aydın mənzərəsini təqdim edir. Bu qəzet yarananda Azərbaycan hələ dövlət müstəqilliyini bərpa etməmişdi. O illərdə ölkədə xaos, anarxiya, özbaşınalıqlar hökm sürürdü. Müstəqil mətbuatın yaranmasından, fəaliyyətindən danışmaq böyük qətiyyət, cəsarət tələb edirdi. Adı ilə tutduğu yolu, məqsəd və məramını açıqlayan qəzet ölkədə baş verən ictimai-siyasi proseslərə də biganə qalmadı. Bütün çətinliklərə baxmayaraq, mətbuatın əsas missiyasını uğurla yerinə yetirdi və fəaliyyətinin ilk günündən başlayaraq geniş oxucu kütləsinin rəğbətini qazandı.

Hazırkı dövrdə dövlətimizin uğurlu siyasəti və bunun nəticəsində əldə olunan nailiyyətlər ölkə ictimaiyyətinə faktlar əsasında çatdırılır. “İki sahil” Azərbaycanın müstəqillik tarixinin hər bir mərhələsinin, dövrünün reallıqlarının güzgüsü ilə yanaşı, carçısı, təbliğatçısıdır. Qəzetin elektron versiyası daim yenilənir, internet televiziyası fəaliyyət göstərir. Zamanın, dövrün tələbləri dəyişsə də, nəşr bu çağırışlara uyğun yeniləşib inkişaf etsə də, tutduğu yola sadiqliyi dəyişməyib. Bir yaşlı “İki sahil” 31 yaşını qeyd edən “İki sahil”ə bu tövsiyəni etmiş və həmin tövsiyələrin nəticələri bugünkü uğurlarımızda əsas rol oynamışdır.

Qəzetin fəaliyyətinin əsas istiqamətinin Heydər Əliyev ideyalarının təbliği olduğunu deyən V.Rəhimzadə vurğulayıb ki, Ümummilli Liderin yaradıcısı olduğu Yeni Azərbaycan Partiyasının təsis olunması məqsədilə “91-lər”in Ulu Öndərə müraciətindən bu günədək qəzet partiyanın keçdiyi yolun işıqlandırılmasında, cəmiyyətin avanqard qüvvəsi kimi gördüyü işlərin təbliğində fəal iştirak edir. Ötən il Yeni Azərbaycan Partiyasının Zəfərimizin reallıqları fonunda keçirilən VII qurultayında dövlətimizin başçısı, YAP-ın Sədri İlham Əliyevin proqram xarakterli çıxışı partiyanın yaranmasından bugünədək keçilən yolun, qarşıdakı hədəflərin təqdimatında əhəmiyyətli rol oynadı. Otuz bir illik yol qət edən “İki sahil” ölkəmizin aparıcı siyasi təşkilatı olan Yeni Azərbaycan Partiyasının bütün təşəbbüslərini, qərarlarını, partiyanın həyatında əhəmiyyətli rol oynayan qurultaylarını, şəhər və rayon təşkilatlarının fəaliyyətini, keçirdikləri silsilə tədbirləri, ən əsası ölkəmizin həyatında əhəmiyyətli rol oynayan seçkilərdə Yeni Azərbaycan Partiyasının hazırlıq mərhələsindən başlamış səsvermə prosesinə qədər fəaliyyətinin bütün məqamlarını geniş şəkildə işıqlandırır, YAP-ın qələbə, ümumxalq, gənclər partiyası kimi nüfuz qazanmasını konkret faktlar əsasında ölkə ictimaiyyətinə çatdırır. Qəzet Yeni Azərbaycan Partiyasının dünənin, bu günün və gələcəyin partiyası olduğunu, tarixin sınaqlarından şərəflə çıxaraq cəmiyyətin aparıcı qüvvəsinə çevrilməsini, YAP-a xidmət etməyin xalqa, dövlətə xidmət etmək olduğunu əsaslı şəkildə analitik yazılar, partiyanın yarandığı dövrün şahidlərinin vasitəsilə indiki və gələcək nəsillərə çatdırılmasına səy göstərir. Kollektivimiz Azərbaycanın dünəninin, bu gününün və sabahının əsası kimi dəyərləndirilən Heydər Əliyev ideyalarının təbliğatçıları olmaqdan şərəf duyur.

Kollektivdə gənclərin roluna da toxunan baş redaktor deyib ki, bütün dövrlərdə gənclərin potensial imkanlarından, müasir dünyagörüşlərindən, yeniliyə, təkmilləşməyə daha çox maraq göstərərək ortaya qoyduqları yeni ideyalardan bəhrələnməyə xüsusi diqqət göstərilir. Bu gün kollektivdə böyüklərin təcrübəsi ilə gənclərin dinamizmi arasında vəhdət yaradılır. Bu isə öz növbəsində qəzetin fəaliyyətində uğurlara yol açır, internet televiziyasının inkişafında, qəzetin elektron versiyasının təkmilləşməsində, yeniləşməsində, bununla da hər yaşda oxucularımızın, izləyicilərimizin informasiya tələbatını ödəməyimizdə özünü aydın şəkildə büruzə verir.

Ölkəmizdə azad mətbuatın inkişafı istiqamətində davamlı addımlar atıldığını, mətbuatın inkişaf səviyyəsinin dövlətin inkişafının göstəricisi olduğunu diqqətə çatdıran Vüqar Rəhimzadə bildirib ki, dövlətə, xalqa xidmətdən şərəf duyan, qərəzsizliyi, obyektivliyi, vətənpərvərlik kimi prinsipləri fəaliyyətlərinin önündə saxlayan “İki sahil”çilər dövlətimizin başçısı İlham Əliyevin “Əldə olunan uğurlarla kifayətlənməməli, daim irəli baxmalıyıq” tezisini əsas tutaraq gələcəyə, yeni hədəflərə doğru inamla addımlayırlar.