ÜÇ AYDA AZƏRBAYCAN ƏHALİSİNİN SAYI 23 MİN NƏFƏR ARTMIŞDIR
Dövlət Statistika Komitəsindən AZƏRTAC-a bildirmişlər ki, Azərbaycan əhalisinin sayı üç ayda 23 min nəfər (0,3 faiz) artaraq, aprelin 1-nə 8 milyon 653 min nəfər olmuşdur. Əhalinin ümumi sayından 4477 min nəfəri və ya 51,7 faizi şəhər, 4176 min nəfəri (48,3 faiz) kənd sakinləridir.
Ölkə əhalisinin 49,3 faizini kişilər, 50,7 faizini qadınlar təşkil edir. Əhalinin orta yaşı 31, doğulanda gözlənilən ömür uzunluğu isə 72,4 yaş, o cümlədən kişilərdə 69,7, qadınlarda 75,1 yaş təşkil edir.
Cari ilin yanvar-martında ölkədə 38 min, təxminən gündə 417 körpə dünyaya gəlmiş, onların 53,4 faizi oğlan, 46,6 faizi isə qız uşaqlarıdır. Körpələrin 330-u əkiz, 3-ü üçəmdir. Hazırda orta hesabla bir qadına bütün ömrü boyu iki doğulmuş uşaq düşür.
İlin əvvəlindən ölkədə 15,3 min ölüm halı qeydə alınmışdır. Birinci rübdə 16,2 min nikah və 2 min boşanma qeydə alınmış və əhalinin hər min nəfərinə hesabı ilə nikahların və boşanmaların sayı ötən ilin səviyyəsində qalmışdır.
Üç ayda Daxili İşlər Nazirliyinin pasport xidmətləri tərəfindən Azərbaycana daimi yaşamaq üçün 741 nəfər gələn və ölkədən 677 nəfər gedən qeydə alınmışdır.
Bölmənin digər xəbərləri
