ÜMUMMİLLİ LİDER HEYDƏR ƏLİYEVİN 85 İLLİK YUBİLEYİ BƏRDƏDƏ GENİŞ QEYD OLUNUR
AZƏRTAC xəbər verir ki, ümummilli lider Heydər Əliyevin 85 illik yubileyi Bərdə rayonunda geniş qeyd olunur. Yubileyin yüksək səviyyədə keçirilməsi üçün Bərdə Rayon İcra Hakimiyyətinin başçısı xüsusi sərəncam imzalamış, geniş tədbirlər planı təsdiq edilmişdir.
Plana əsasən, bütün idarə, müəsisə və təşkilatlarda yığıncaqlar keçiriləcək, ulu öndərin həyatı, çoxşaxəli fəaliyyəti barədə geniş söhbətlər aparılacaq, məruzələr və çıxışlar dinləniləcək, ümumtəhsil məktəblərində Heydər Əliyev dərsləri, Dövlət İdarəetmə və Texnologiya Kollecində, peşə liseyində elmi-praktiki konfranslar keçiriləcəkdir.
Rayonun mədəni-maarif müəssisələrində sərgilər, guşələr, stendlər yaradılacaq, musiqi məktəblərində Heydər Əliyev haqqında yazılmış mahnıların, şeirlərin müsabiqəsi keçiriləcəkdir. Mayın 1-dən 10-dək hər gün rayonun idarə, müəssisə və təşkilatlarının, o cümlədən məktəb kollektivləri Heydər Əliyev Muzeyində olacaqlar. “Heydər Əliyev və gənclər”, “Heydər Əliyev və qadın siyasəti” mövzularında dəyirmi masalar təşkil ediləcəkdir. Uşaq, yeniyetmə və gənclər arasında idmanın müxtəlif növləri üzrə yarışlar keçiriləcək, qaliblər mayın 10-da mükafatlandırılacaqlar.
