UŞAQ HÜQUQLARI MƏKTƏBİ YARADILMIŞDIR
AZƏRTAC xəbər verir ki, Ailə, Qadın və Uşaq Problemləri üzrə Dövlət Komitəsi ilə “NUR” Uşaq və Gənclərin İctimai Birliyi ulu öndər Heydər Əliyevin 85 illik yubileyi münasibətilə Uşaq hüquqları məktəbi yaratmışlar.
Təhsil Nazirliyinin də dəstəklədiyi bu məktəbin ilk məşğələləri aprelin 18-19-da Dövlət Komitəsində keçirilmişdir.
Yeni qurumun məqsədi uşaq hüquqları barədə ətraflı məlumata malik olan, uşaqlarla bağlı mövcud vəziyyəti obyektiv təhlil edə və uşaqlar üçün yararlı cəmiyyətin formalaşdırılması ilə bağlı təkliflər irəli sürə bilən lider uşaqlar qrupu formalaşdırmaqdır.
Məktəbin tədris proqramı Uşaq Hüquqları Konvensiyasının və dünya uşaqlarının vəziyyətinin öyrənilməsindən bəhs edən 10 mövzudan ibarətdir. Məşğələlər hər bir uşağın fəallığı şəraitində keçir, onlara öz fikrini azad ifadə etmək imkanı verilir, təlim zamanı müzakirələrdən, qruplarda işdən, interaktiv oyunlardan geniş istifadə edilir.
Dinləyiciləri 12-15 yaşlı 50 uşaqdan ibarət olan məktəbi müvəffəqiyyətlə başa vuranlara diplom veriləcəkdir.
######
Bölmənin digər xəbərləri
