Bakı, 30 aprel, AZƏRTAC

Nərimanov Rayon Gənclər və İdman İdarəsinin təşkilatçılığı ilə Vətən müharibəsi şəhidi, baş leytenant Həsənağa Abdullazadənin xatirəsinə həsr edilmiş məktəblilər arasında basketbol üzrə rayon turniri keçirilib.

İdarədən AZƏRTAC-a bildiriblər ki, 212 saylı tam orta məktəbdə keçirilən turnirin açılış mərasimində Vətən Müharibəsi Qəhrəmanı, baş leytenant, şəhid Azad Hümbətovun valideynləri Arif Hümbətov və Leyla Hümbətova, Vətən müharibəsi şəhidi, baş leytenant Həsənağa Abdullazadənin atası Şakir Abdullazadə, Nərimanov Rayon Gənclər və İdman İdarəsinin rəisi Nəcəf Novruzov və məktəbli basketbolçular iştirak ediblər.

Tədbirdə çıxış edənlər Həsənağa Abdullazadənin atasına Vətənimiz üçün ləyaqətli övlad böyütdüyünə görə təşəkkür edərək Allahdan ona səbir diləyiblər. Prezident, Müzəffər Ali Baş Komandan İlham Əliyevin rəhbərliyi ilə 44 günlük Vətən müharibəsində qüdrətli Azərbaycan Ordusunun qazandığı tarixi Qələbədən söz açan çıxışçılar dövlət və xalq birliyinin yaratdığı dəmir yumruğun düşmənin başını əzdiyini və qorxulu kabusuna çevrildiyini söyləyiblər.

Basketbol turnirinin nəticələrinə əsasən birinci yeri 45 nömrəli tam orta məktəbin komandası, ikinci yeri 82 nömrəli tam orta məktəbin komandası, üçüncü yeri Vətən Müharibəsi Qəhrəmanı Azad Hümbətov adına 291 nömrəli Ekologiya liseyinin komandası tutub.

Basketbol üzrə Nərimanov rayon turnirinin qalibləri müvafiq dərəcəli diplom və medallarla təltif olunublar. Turnirin sonunda şəhidin atası Şakir Abdullazadəyə xatirə diplomu və Azərbaycanın Dövlət Bayrağı təqdim olunub.

Şəhidin atası Şakir Abdullazadə çıxış edərək övladı ilə qürur duyduğunu bildirib, şəhid ailələrinə göstərilən diqqət və qayğıya görə Prezident, Silahlı Qüvvələrin Müzəffər Ali Baş Komandanı İlham Əliyevə və Birinci vitse-prezident Mehriban Əliyevaya minnətdarlığını ifadə edib.