XARİCİ ÖLKƏLƏRDƏ TƏHSİL ALACAQ AZƏRBAYCAN GƏNCLƏRİNİN SEÇİM QAYDALARI TƏSDİQ EDİLMİŞDİR
Tələbə Qəbulu üzrə Dövlət Komissiyasından AZƏRTAC-a bildirmişlər ki, xarici ölkələrdə təhsil alacaq Azərbaycan gənclərinin seçim qaydaları təsdiq edilmişdir.
Respublika üçün müxtəlif sahələr üzrə yüksək ixtisaslı mütəxəssislərin hazırlanması məqsədilə Prezident İlham Əliyevin 2007-ci il 16 aprel tarixli Sərəncamı ilə “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı” təsdiq olunmuşdur.
Prezidentin müvafiq Sərəncamının icrasını təmin etmək üçün Nazirlər Kabinetinin 2008-ci il 3 iyun tarixli qərarı ilə “Xarici ölkələrdə təhsil alacaq Azərbaycan gənclərinin seçim Qaydaları” təsdiq edilmişdir.
Nazirlər Kabinetinin qərarına əsasən xarici ölkələrdə bakalavr, magistr, elmlər namizədi, elmlər doktoru dərəcəsi almaq istəyən iddiaçıların seçilməsi Təhsil Nazirliyi tərəfindən aparılır və bu seçim Azərbaycan Respublikasının Prezidenti yanında Təhsil üzrə Komissiya tərəfindən təsdiq olunur.
Nazirlər Kabinetinin 2008-ci il 3 iyun tarixli qərarı ilə “Azərbaycan gənclərinin xaricdə təhsil almaları məqsədi ilə seçilmiş ali təhsil müəssisələrinin siyahısı” və “Azərbaycan gənclərinin xaricdə təhsil almaları üzrə prioritet sahə, ixtisas və proqramların siyahısı” təsdiq edilmişdir.
Müvafiq Sərəncama əsasən 24 xarici ölkənin ali məktəblərində bakalavr pilləsi üzrə təhsil almaq imkanı nəzərdə tutulmuşdur: Almaniya - 28 ali məktəb, Avstraliya - 21, Böyük Britaniya - 40, Belçika - 6, Çin -11, İrlandiya - 4, İspaniya - 9, İtaliya - 19, İsveçrə - 10, Kanada - 15 və s.
Azərbaycan gənclərinin xaricdə təhsil almaları üzrə prioritet sahələr: sənaye, informasiya və kommunikasiya texnologiyaları, kənd təsərrüfatı, nəqliyyat, tikinti, təhsil, tibb, mədəniyyət, hüquq və s.
Bölmənin digər xəbərləri
