SİYASƏT
Xətai rayonunda ulu öndər Heydər Əliyevin anadan olmasının 96 illiyinə həsr olunan tədbir keçirilib
![](/files/galleryphoto/2019/2/1200x630/15569041585755947603_1200x630.jpg)
![](/files/galleryphoto/2019/2/1200x630/15569041586190410659_1200x630.jpg)
Bakı, 3 may, AZƏRTAC
Xətai rayonunda müasir müstəqil Azərbaycan dövlətinin qurucusu, ulu öndər Heydər Əliyevin anadan olmasının 96 illiyinə həsr olunan tədbir keçirilib.
AZƏRTAC xəbər verir ki, tədbir iştirakçıları əvvəlcə Ümummilli Liderin YAP Xətai rayon təşkilatının foyesindəki büstü önünə qızıl gül dəstələri düzüblər, xatirəsini ehtiramla yad ediblər.
Sonra akt zalında davam edən tədbiri giriş sözü ilə açan YAP Xətai rayon təşkilatının sədri, Milli Məclisin deputatı Hüseynbala Mirələmov bildirib ki, dahi şəxsiyyət Heydər Əliyevin doğum gününün böyük sevinc hissi ilə qeyd olunması ölkəmizdə bir ənənəyə çevrilib. Ümummilli Liderin doğum gününün belə əhval-ruhiyyə ilə qeyd olunması ümumilikdə xalqımızın dövlətə, dövlətçiliyimizə hörmət və ehtiramının bariz ifadələrindən biridir. Bununla Azərbaycan xalqı ölkəmizin həyatında və tarixində müstəsna xidmətlər göstərmiş Ümummilli Liderimizin rolunu, uğurlu tarixi missiyasını dəyərləndirir, ona hörmət və ehtiramını bildirir.
H.Mirələmov qeyd edib ki, tarixdə şəxsiyyət amili xalqların, dövlətlərin inkişafında əhəmiyyətli rol oynayır. Hər bir xalq lideri ilə tanınır. Düşünülmüş və məqsədyönlü siyasəti ilə Azərbaycanı dünya birliyinin fəal üzvünə çevirən, bugünkü uğurlarımız üçün möhkəm baza yaradan ulu öndər Heydər Əliyevin Azərbaycan xalqının tarixində böyük rolu vardır.
YAP Siyasi Şurasının üzvü, “İki sahil” qəzetinin baş redaktoru Vüqar Rəhimzadə ulu öndər Heydər Əliyevin anadan olmasının 96 illiyinin hər birimizin həyatında önəmini xüsusi vurğulayıb. Bildirib ki, bu illər Azərbaycanın tarixinə harada yaşamasından asılı olmayaraq hər bir azərbaycanlının qürur duya biləcəyi uğurları yazıb. O uğurları ki, bu gün ölkəmiz həmin təməl üzərində daha da möhkəmlənir, qüdrətlənir, yeni-yeni hədəflərə doğru inamla addımlayır.
V.Rəhimzadə ulu öndər Heydər Əliyevin hakimiyyətinin hər iki dövrünü paralel şəkildə təhlil edərək bildirib ki, hər iki dövr Azərbaycanı inkişaf etdirmək, imzasını imzalar arasında görmək istəyinin nümayişi ilə xarakterizə olunur. Ümummilli Lider hakimiyyətinin birinci dövründə Azərbaycanı gələcəkdə müstəqil görmək istəyini atdığı addımları ilə təsdiqləyirdi. Azərbaycan gənclərinin keçmiş İttifaqın ən nüfuzlu ali məktəblərində təhsil almağa göndərilməsi, həmçinin C.Naxçıvanski adına hərbi liseyin yaradılması və s. kimi mühüm addımlar bu günümüz üçün möhkəm təməl rolunu oynayıb.
YAP Siyasi Şurasının üzvü Azərbaycanın dövlət müstəqilliyini yenidən bərpa etdikdən, daha dəqiq desək, ulu öndər Heydər Əliyevin 1993-cü ildə xalqın təkidli tələbi ilə hakimiyyətə qayıdışından bu günümüzə qədər uzanan davamlı inkişaf yolunu geniş şərh edərək bildirdi ki, böyük şəxsiyyətlərin doğum günü olur, amma ölüm günü olmur. Onların ideyaları daim dövlətin, xalqın qarşısında yeni-yeni üfüqlər açır. Dahi şəxsiyyət Heydər Əliyevin ideyaları Azərbaycanın dünəninin, bu gününün və sabahının əsasıdır.
“Ulu öndər Heydər Əliyevin bütövlükdə həyatı, fəaliyyəti, ideyaları bir məktəbdir. Bu məktəb bu gün də davam edir, Azərbaycanın davamlı inkişafına xidmət göstərir”,- deyən Heydər Əliyev adına liseyin direktoru Sevinc Orucova bildirib ki, Azərbaycanı xaosdan, anarxiyadan, özbaşınalıqdan, iqtisadi tənəzzüldən xilas edib inkişaf, tərəqqi yoluna çıxaran ulu öndər Heydər Əliyevin xilaskarlıq missiyasından saatlarla, günlərlə danışmaq olar. Vətəninə, xalqına bağlı olan Heydər Əliyevin bütün soydaşlarımızı bir amal-azərbaycançılıq ideyası ətrafında sıx birliyə çağırışı bu gün hər birimizin fəaliyyətinin əsasını təşkil edir. Bu gün fəxr hissi ilə qeyd edirik ki, harada yaşamasından asılı olmayaraq bütün azərbaycanlılar öz ölkələrinin təbliğatçısıdır, davamlı inkişafımıza töhfə vermək üçün ciddi səylər göstərirlər.
Milli Məclisin beynəlxalq münasibətlər və parlamentlərarası əlaqələr komitəsinin sədri Səməd Seyidov qeyd edib ki, illər keçdikcə, yeni ab-hava formalaşdıqca, biri-birindən əhəmiyyətli işlər görüldükcə daha dərindən dərk olunur ki, bu uğurların təməlində dahi şəxsiyyət Heydər Əliyevin düşünülmüş siyasəti dayanır. Son 15 ildə bu siyasəti uğurla davam etdirən Prezident İlham Əliyev Heydər Əliyev fəlsəfəsinin, Azərbaycanı inkişafa aparan strategiyanın düsturunu dünyaya təqdim edir. Ölkəmizin iqtisadi uğurları davamlıdır. Daxili siyasətimizin davamı kimi dəyərləndirilən xarici siyasətdə də uğurlarımızın miqyası genişdir. Azərbaycanın 2011-ci ildə 155 ölkənin dəstəyini qazanaraq BMT Təhlükəsizlik Şurasına qeyri-daimi üzv seçilməsi müstəqillik tarixində uğurlarımızın, ən əsası haqqa, ədalətə söykənən mövqeyimizə verilən dəyərin göstəricisidir.
S.Seyidov bildirib ki, ulu öndər Heydər Əliyevin tezisləri sırasında “Azərbaycan dünyaya günəş kimi doğacaq” fikri əsas yer tuturdu. Ümummilli Liderin uzaqgörənliklə qeyd etdiyi bu fikir təbii ki, həyata keçirilən siyasətin önündə dövlət maraqlarının dayanmasına əsaslanırdı. Azərbaycan Ulu Öndərin gələcəyə hesablanmış siyasəti nəticəsində çox qısa zamanda dünya birliyinin layiqli üzvünə çevrildi. Bu gün iqtisadi, siyasi, humanitar mərkəzə çevrilən Azərbaycan ev sahibliyi etdiyi tədbirlər vasitəsilə reallıqlarını dünyaya çatdırır. Bu gün bu mühüm uğurumuzu da xüsusi qeyd edirik ki, dünyanın yeni xarici siyasəti Azərbaycanda müzakirə olunur. Bu, Heydər Əliyev siyasətinin nəticəsidir.
Tədbirdə YAP sıralarına yeni daxil olanlara partiyanın üzvlük vəsiqəsi təqdim olunub.
Sonda dahi şəxsiyyət Heydər Əliyevin həyat və fəaliyyətini əks etdirən film nümayiş etdirilib.