Xəzər Universiteti reytinq cədvəlində dünyanın ən yaxşı universitetləri sırasında
Bakı, 4 aprel, AZƏRTAC
“Times Higher Education” aprelin 3-də ilk dəfə BMT-nin “Dayanıqlı İnkişaf Məqsədləri”nə əsaslanan, sosial və iqtisadi töhfələrinə görə fərqlənən ən yaxşı dünya universitetlərini müəyyənləşdirərək, “THE University Impact Rankings 2019” reytinq cədvəlini nəşr edib.
Xəzər Universitetindən AZƏRTAC-a bildirilib ki, reytinqin ilk nəşrində 76 ölkədən 462 universitetin adı yer alıb. Azərbaycandan ilk dəfə Xəzər Universiteti reytinq siyahısına daxil edilib. Universitet “Təhsilin keyfiyyəti” üzrə “301+”, “Sənaye, innovasiya və infrastruktur” üzrə 201-300-cü sırada qərarlaşıb.
Xəzər Universitetinin bu siyahıya daxil edilməsi Azərbaycan təhsili üçün böyük nailiyyətdir və bu ali məktəbin tədris, tədqiqat və biliyin ötürülməsi sahəsində “Dayanıqlı İnkişaf Məqsədləri”nə dəstəyini təsdiq edir.
BMT-nin “Dayanıqlı İnkişaf Məqsədləri” bütün ölkələrdə düzgün iqtisadi və sosial davamlı inkişafa nail olmaq üçün nəzərdə tutulub. Bu məqsədlər 2015-ci ildə daha yaxşı dünya yaratmağın yolunun əməkdaşlıqdan keçdiyini vurğulamaq məqsədilə BMT-yə üzv ölkələr tərəfindən qəbul olunub.
Bölmənin digər xəbərləri
