XIZI VƏ QOBUSTAN QƏSƏBƏLƏRİNƏ ŞƏHƏR STATUSU VERİLƏCƏKDİR
AZƏRTAC xəbər verir ki, Xızı rayonunun Xızı və Qobustan rayonunun Qobustan qəsəbələrinə şəhər statusu veriləcəkdir.
Bu barədə qanun layihələri Milli Məclisin regional məsələlər daimi komissiyasının aprelin 18-də keçirilmiş iclasında müzakirə olunmuşdur. Komissiyanın üzvü Tahir Rzayev bildirmişdir ki, Xızı qəsəbəsinə şəhər statusunun verilməsi və eyniadlı inzibati ərazi dairəsinin Xızı şəhər inzibati ərazi dairəsi hesab edilməsi barədə rayon ictimaiyyəti Toponimiya komissiyasına və Milli Məclisə müraciət etmişdir. Regionların sosial-iqtisadi inkişafı Dövlət Proqramının uğurlu icrası nəticəsində Xızı rayonunda və eyniadlı qəsəbədə xeyli işlər görülmüş, geniş infrastruktur yaradılmışdır. Qəsəbədə iri ticarət obyektləri, poçt, mədəniyyət evi, kitabxana tikilmiş, hər cür abadlığı olan park və istirahət guşələri salınmışdır. Qəsəbə şəhər standartlarına cavab verir.
Qobustan rayonunun inzibati ərazi bölgüsündə edilən dəyişikliklər barədə məlumat verən T.Rzayev bildirmişdir ki, qanun layihəsində rayonun Mərəzə qəsəbəsinin Qobustan qəsəbəsi adlandırılması və Nərimankənd kəndinin Qobustan qəsəbəsi ilə birləşdirilməsi nəzərdə tutulmuşdur. Nərimankənd kəndinin adı ölkəmizin ərazi vahidlərinin və inzibati ərazi dairələrinin Dövlət reyestrindən çıxarılacaqdır.
Komissiya üzvləri Xızı və Qobustan qəsəbələrinə şəhər statusu verilməsini və digər məsələləri razılıqla qarşılamışlar. Hər iki qanun layihəsi təsdiqlənmək üçün Milli Məclisin müzakirəsinə tövsiyə olunmuşdur.
Bölmənin digər xəbərləri
