Yaponiya Şimali Koreya ilə ikitərəfli sammitin mümkünlüyünü araşdırır
Tokio, 31 mart, AZƏRTAC
Yaponiya hökuməti yaxın günlərdə keçirilməsi gözlənilən ABŞ-Şimali Koreya sammiti ilə əlaqədar prosesləri diqqətlə izləyir.
AZƏRTAC NHK telekanalına istinadla xəbər verir ki, bu marağın əsasında Pxenyan ilə dialoqu qaydaya salmaq üçün kluarlarda aparılan danışıqlar və mümkün olduğu təqdirdə ikitərəfli sammitin təşkili dayanır.
Xatırladaq ki, Şimali Koreya lideri Kim Çen In cari həftədə ilk dəfə Çin Xalq Respublikasının sədri Si Cinpin ilə görüşüb. Bununla yanaşı, o, aprelin 27-də Koreya Respublikasının Prezidenti Mun Çje-in ilə sammitin keçirilməsini planlaşdırır. Eyni zamanda, Kim Çen Inın ABŞ Prezidenti Donald Trampla görüşəcəyi də bildirilir.
Yaponiya hökumətinin üzvlərini və müxalifət partiyalarının nümayəndələrini baş verən bu hadisələr fonunda Yaponiyanın kənarda qala biləcəyi narahat edir. Bununla yanaşı, Yaponiya hökumətinin nümayəndələri Şimali Koreyanın Rusiya ilə sammit təşkil edəcəyindən də ehtiyatlanırlar.
Hökumətin digər qisminin rəyinə görə, Şimali Koreya ilə birbaşa danışıqlar oğurlanmış yapon vətəndaşları probleminin həllinə kömək edə bilər.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
