Yaponiyada xarici vətəndaşlarla problemlərin həlli üzrə hökumət strukturu yaradılıb
Bakı, 15 iyul, AZƏRTAC
Yaponiya son illərdə ölkədə xarici vətəndaşların sayının sürətlə artması ilə bağlı narahatlıqları aradan qaldırmaq üçün inzibati orqan yaradıb. AZƏRTAC Yaponiya mətbuatına istinadla xəbər verir ki, ölkənin qeyri-yapon sakinlərinə münasibətdə siyasət məsələsi bazar günü keçiriləcək milli seçkilərdə əsas mövzuya çevrilir.
Hökumət bildirir ki, qurum xarici vətəndaşların cəlb olunduğu cinayət və həddindən artıq turist axını kimi problemləri həll etmək üçün idarələrarası “nəzarət mərkəzi” rolunu oynayacaq.
Keçən il Yaponiyaya gələn əcnəbi vətəndaşların sayı rekord həddə çataraq təxminən 3,8 milyon olub, baxmayaraq ki, bu, hələ də əhalinin ümumi sayının cəmi 3 faizini təşkil edir.
İnzibati orqanın yaradılmasına iyun ayında Baş nazir Şigeru İşibanın Liberal Demokrat Partiyasından olan bir qrup qanunvericinin “xarici vətəndaşlarla nizamlı və harmonik birgəyaşayış cəmiyyəti” yaratmaq üçün tədbirlər təklif etməsindən sonra başlanılıb.
Tədbirlərə Yaponiya sürücülük vəsiqələrinə keçən xarici vətəndaşlarla bağlı və onların daşınmaz əmlak alması üçün daha sərt tələblərin qəbul edilməsi daxildir.
Baş nazir bildirib: “Bəzi əcnəbi vətəndaşlar tərəfindən törədilən cinayətlər və qanun pozuntuları, eləcə də müxtəlif inzibati sistemlərdən sui-istifadə halları ictimaiyyətin özünü narahat və aldadılmış hiss etdiyi bir vəziyyət yaradıb”.
Həm müvəqqəti, həm də daimi əsaslarla bu ölkədə yaşayan xarici vətəndaşların axını ilə bağlı narahatlıqlar seçkilər zamanı rezonans doğurub və rəy sorğuları “Öncə yaponlar” proqramını müdafiə edən kiçik populist Sanseyto Partiyasının dəstəyinin sürətlə artdığını göstərir.
Bölmənin digər xəbərləri
