Zaqatalada güclü leysanın törətdiyi fəsadlar aradan qaldırılıb
Zaqatala, 12 may, Mustafa Dadaşov, AZƏRTAC
Mayın 11-də axşam saatlarından başlayaraq Zaqatala rayonu ərazisində yağan güclü leysan yağışları nəticəsində rayonun bəzi kəndlərində fərdi təsərrüfatlara, infrastruktura, rabitə və elektrik verilişi xətlərinə, su təsərrüfatına ziyan dəyib, bəzi yaşayış məntəqələrinə elektrik enerjisinin verilməsində qısa fasilələr yaranıb. Ərazi icra nümayəndəliklərindən verilən məlumata görə, təbii fəlakət nəticəsində rayonun Höytala, Yolayrıc və Mazıx kəndlərində 140-a yaxın fərdi evin həyətini su basıb.
Zaqatala rayon fövqəladə hallar komissiyasından AZƏRTAC-ın bölgə müxbirinə bildiriblər ki, rayon icra hakimiyyətinin aidiyyəti dövlət qurumları ilə birgə həyata keçirdiyi zəruri tədbirlər nəticəsində güclü leysanın törətdiyi fəsadlar tamamilə aradan qaldırılıb. Hazırda rayonun yaşayış məntəqələrinə elektrik enerjisinin və içməli suyun verilməsində heç bir problem yoxdur.
Bölmənin digər xəbərləri
