Emin Hacıyev: Biz Sankt-Peterburqdakı SZKEO nəşriyyatının Azərbaycandan üzr istəməsini tələb edirik
Moskva, 10 yanvar, AZƏRTAC
“Rusiya Federasiyası Azərbaycan Respublikasının beynəlxalq miqyasda tanınmış sərhədləri daxilində, o cümlədən Ermənistan tərəfindən işğal edilmiş Dağlıq Qarabağ ərazisi də daxil olmaqla, onun ərazi bütövlüyünü tanıyır. Rusiya qondarma “DQR”in “müstəqilliyini” heç vaxt tanımayıb, ona maliyyə köməyi və siyasi dəstək göstərməyib. Rusiya və Azərbaycan sərhədlərin qarşılıqlı tanınması prosesini başa çatdırıblar”.
Rusiyanın Azərbaycanlı Gənclər Birliyinin (RAGB) idarə heyətinin üzvü Emin Hacıyev bu fikirləri AZƏRTAC-ın müxbiri ilə söhbətində Moskvadakı “Çitay qorod” kitab mağazalarında sərbəst satışda olan “Stranı mira” (“Dünya ölkələri”) ensiklopediyasında “DQR” haqqında da məqalə olması barədə informasiyanı şərh edərək deyib.
E.Hacıyevin sözlərinə görə, cəsarətlə demək olar ki, Rusiya ilə Azərbaycan arasında strateji tərəfdaşlıq xarakteri daşıyan münasibətlər 2000-ci illərdən başlayaraq yeni mərhələyə keçıb. Təməli Azərbaycan xalqının ümummilli lideri Heydər Əliyev və Rusiya Prezidenti Vladimir Putin tərəfindən qoyulmuş qarşılıqlı münasibətlərə əsaslanan bu siyasət hazırda Azərbaycan Prezidenti İlham Əliyevin və Rusiya Prezidenti Vladimir Putinin rəhbərliyi altında uğurla həyata keçirilir. İki ölkənin liderləri vaxtaşırı görüşür, həm regionda, həm də dünyada baş verən proseslərin çoxuna baxışların oxşar olmasını qeyd edirlər.
RAGB nümayəndəsi deyib: “Bəzi üçüncü qüvvələrin istəyinə rəğmən, ölkələrimiz arasında münasibətlər uğurla inkişaf edir. İki ölkə arasında humanitar əməkdaşlığı xüsusi qeyd etmək istərdim. 2007-ci ildən bəri Heydər Əliyev Fondunun vitse-prezidenti Leyla Əliyevanın rəhbərliyi ilə Heydər Əliyev Fondunun Rusiyadakı nümayəndəliyi fəaliyyət göstərir. Fondun Rusiyadakı nümayəndəliyinin əsas vəzifələrindən biri mədəni-mənəvi sahədə qarşılıqlı anlaşmanı möhkəmləndirməkdir. 2017-ci ildə Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban Əliyevanın II dərəcəli Müqəddəs Mələksima Knyagina Olqa ordeni ilə təltif edilməsi əlamətdar hadisə oldu. Ölkələrimizin gənclərinin inteqrasiyasına yönəlmiş tədbirlər - hər il həyata keçirilən gənclər mübadiləsi, forumlar və layihələr, heç şübhəsiz, xalqlarımız arasında gələcəkdə də yaxşı münasibətlərin rəhnidir. Milli mənsubiyyətindən asılı olmayaraq istedadlı gənclərin dəstəklənməsi üçün maksimum səy göstərən Leyla Əliyevanın rəhbərliyi ilə RAGB-nin rolu ən yüksək qiymətə layiqdir. Azərbaycan çoxsaylı rusiyalılar üçün sevimli istirahət yerinə çevrilib. Ölkəmizə səfər edən bu insanlar Azərbaycanın sürətli inkişafı və bənzərsiz gözəllikləri ilə yanaşı, bu diyarda Rusiyaya, rus dilinə xüsusi hörmət bəslənməsini qeyd edirlər. Bizi sevindirən müsbət faktlar belədir”.
E.Hacıyev daha sonra deyib: “Təəssüf doğuran bir neqativ fakt da var ki, onun barəsində susmaq olmaz. Məlum olub ki, Sankt-Peterburqdakı SZKEO nəşriyyatında çapdan çıxmış böyük illüstrasiyalı ensiklopediyada tanınmamış “Dağlıq Qarabağ Respublikası” haqqında informasiya yer alıb. Kitabın annotasiyasında qeyd edilir ki, bu ensiklopediyada Yer kürəsinin bütün ölkələri barədə ən yeni məlumatlar toplanıb. “DQR”in təsviri heç kəs tərəfindən tanınmamış bu qondarma separatçı qurumun paytaxtı, dövlət dili, ərazisi, əhalisinin sıxlığı və pul vahidi barədə məlumatdan başlanır. Bundan əlavə, kitabda qondarma “DQR”in internet domeni və telefon kodu, “bayrağı”nın və “gerbi”nin təsviri verilir. Həmin bölmədə bir sıra başqa məlumat da təqdim edilib. Təbii ki, bu informasiya Qarabağ separatçılarının nöqteyi-nəzərini əks etdirir və yalandır. Qarabağ separatçıları ən müxtəlif provokasiyalar üçün hər bir imkandan istifadə edirlər. Bizi ən çox hiddətləndirən odur ki, bu hərəkət qarşılıqlı hörmətə əsaslanan Azərbaycan-Rusiya münasibətlərinin xarakterinə əsla uyğun gəlmir”.
E.Hacıyevin fikrincə, bu kitab özəl mətbəə tərəfindən buraxılıb və onu rəsmi Moskvanın nöqteyi-nəzəri kimi qiymətləndirmək olmaz. Çox ehtimal ki, bu, erməni tərəfin bayağı provokasiyasıdır və kitabın naşirlərinə “DQR” haqqında yalan informasiya təqdim ediblər, halbuki hətta Ermənistan da “DQR”in müstəqilliyini tanımağa cəsarət etmir. Lakin nəşriyyatın ləyaqəti, sanbalı məhz onda ifadə olunur ki, o, provokasiyaların yayıcısı kimi istifadə edilməsinə imkan verməməlidir.
E.Hacıyev vurğulayıb: “Bununla əlaqədar biz Sankt-Peterburqdakı SZKEO nəşriyyatından Azərbaycandan üzr istəməsini, ensiklopediyanın bütün tirajını satışdan çıxarmasını, gələcəkdə onu yenidən, lakin qondarma “DQR” barədə informasiya daxil edilmədən nəşr etmək hüququ əldə etməsini tələb edəcəyik. Bu, hər bir azərbaycanlı üçün, onun hansı ölkədə yaşamasından asılı olmayaraq, çox həssas məsələdir. Bu məsələ, əlbəttə, bizim hamımızın ikinci Vətən hesab etdiyimiz Rusiyanın böyük Azərbaycan diasporu üçün də həssas məsələdir. Məhz bu səbəbdən, biz Rusiyanın bu və ya digər formada hər hansı provokasiyalara cəlb edilməsinin əleyhinəyik. Xüsusən ona görə ki, Rusiya məhz Ermənistan-Azərbaycan, Dağlıq Qarabağ münaqişəsinin tənzimlənməsi ilə məşğul olan ATƏT-in Minsk qrupunun həmsədr ölkəsidir”.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
