Tərtərdəki meyvə bağlarında budama işi aparılır VİDEO
Tərtər, 11 fevral, Tahir Ağaməmmədov, AZƏRTAC
Tərtər rayonundakı meyvə bağlarında qış qulluq işlərindən olan ağacların budanması həyata keçirilir.
Rayonun digər bağlarında olduğu kimi, “Aqropat” MMC tərəfindən Tərtər rayonunun Xoruzlu kəndində yaradılmış intensiv bağçılıq təsərrüfatında da ağacların budanması işləri davam etdirilir. Aqronom Asif Zeynalov AZƏRTAC-ın bölgə müxbirinə müsahibəsində bildirib ki, meyvə bağlarında iş ilboyu davam etdirilir: “Noyabrın sonlarından martın 15-dən qış budaması həyata keçirilir. Ağaclar budandıqda cavanlaşır, məhsuldarlığı artır. Budanmış ağacın meyvələri də sağlam və iri olur. Biz hazırda şaftalı bağında budama işi aparırıq. Hər ağacda 4 əsas budaq saxlayırıq. Bu, ağacın yaxşı Günəş şüası qəbul etməsi üçündür. Bu cür budama apardıqda həm ağac, həm də meyvələri sağlam olur".
Aqronom deyib ki, meyvə bağlarında əsas işlərdən biri də alaq otlarına qarşı mübarizə aparmaqdır: “Bu iş üç üsulla - kimyəvi dərmanlama, kətmənləmə və ağacların dibinə xüsusi örtüklərin sərilməsi ilə həyata keçirilir. Biz örtükdən istifadəyə üstünlük veririk. Ağac əkilən zaman tinglərin dibinə xüsusi örtük sərilir və həmin yerdə bir neçə il alaq otu bitmir”.
Qeyd edək ki, Tərtər rayonunun iqlimi və münbit torpaqları intensiv bağçılığın inkişafı üçün əlverişlidir. Odur ki, rayonda aqrar sektorun digər sahələri ilə yanaşı, bu istiqamətdə də inkişafa nail olunub. Son illərdə rayon ərazisində meyvə bağlarının sahəsi artırılaraq 1580 hektara çatdırılıb. Həmin bağlardan 2020-ci ildə 13 min 210,8 ton meyvə və giləmeyvə, 343 ton üzüm yığılıb.
“Aqropat” MMC tərəfindən xarici bazarlara çıxarmaq üçün rəqabət qabiliyyətli məhsul istehsal etmək məqsədilə yaradılan bağın sahəsi 250 hektardır. Burada İspaniya və Türkiyədən gətirilmiş yüksək məhsuldar meyvə tingləri müasir texnologiya əsasında əkilib. Təsərrüfatda alma, armud, gilas, ərik, gavalı və şaftalının müxtəlif sortları, həmçinin alça, nar, xurma və badam ağacları müasir texnologiyalar əsasında becərilir. Bağın suvarma suyu ilə təmin olunması üçün 45 min və 21 min kubmetr tutumu olan iki su anbarı inşa edilib. Ağacların suvarılması mərkəzləşdirilmiş qaydada elektron sistemlə damlama üsulu ilə həyata keçirilir.
Bölmənin digər xəbərləri
